Iri perereza rishingiye ku birego byatanzwe n’umudepite hamwe n’umukozi mukuru wa Leta y'ubufaransa utaratangajwe amazina.

Ubushinjacyaha bw’u Bufaransa bwatangije iperereza ry’ubugenzacyaha ku rubuga rwa X ruyoborwa n’umuherwe wa mbere ku Isi Elon Musk, ku birego bivuga ko uru rubuga rwahinduye imikorere y'uburyo rusakaza amakuru arunyuraho ndetse bigahuzwa no kwivanga mu bikorwa by’amahanga.

Umucamanza Laure Beccuau yatangaje ko ubushinjacyaha bwatangiye iperereza ku wa Gatatu w'icyumweru gishize tariki 9 Nyakanga 2025, bugamije kureba niba uru rubuga rwa X rwararenze ku mategeko y’u Bufaransa mu guhindura imikorere yaryo mu gukusanya amakuru y’abarukoresha mu buryo bw’uburiganya.

Iri perereza rishya rije rikurikiye irindi ryari ryaratangiye muri Mutarama, rishingiye ku birego byatanzwe n’umudepite n’umukozi mukuru wa Leta utatangajwe amazina. 

Ikirego cyatangiriweho iryo perereza cya mbere cyavugaga ko X yakwirakwije ubutumwa bwinshi burimo urwango, ivangura rishingiye ku ruhu, gusebanya ku baryamana bahuje ibitsina (LGBT+) n’amagambo arwanya abahuriye muri uyu muryango.

Urubuga rwa X rwa Elon Musk rurageraniwe mu Burayi 

Iri perereza rije mu gihe uru rubuga rwa X rukomeje kunengwa n’inzego zimwe mu Bufaransa no mu Burayi muri rusange.

Ku wa Kane w'icyumweru gishize, abadepite babiri b’u Bufaransa bagejeje ikirego cyabo ku rubuga rw'urwego rureberera ibijyanye n’itangazamakuru n’ikoranabuhanga mu Bufaransa (Arcom), nyuma y’uko Robo y’ubwenge buhangano ya Grok itambukije ubutumwa burimo ivangura n’urwango ku Bayahudi.

Komisiyo y’u Burayi na yo imaze hafi imyaka ibiri igenzura uru rubuga rwa Musk ku byaha bishobora kuba byararenze ku mategeko mashya yitwa 'Digital Services Act' .

Ikibazo cyo gukwirakwiza amakuru y’ibinyoma kiri muri iryo genzura, ariko iyi komisiyo yongeyemo ikijyanye n'uburyo uru rubuga rwa X rusakazamo amakuru arunyuraho.

Hirya no hino mu Burayi, hari gusabwa ko iryo genzura ryihutishwa rikagezwa ku musozo mu gihe cya vuba.