Kinyarwanda
English
Swahili
![Arsenal FC yifatanyije n’u Rwanda muri ibi bihe byo kwibuka Jenoside yakorewe abatutsi mu 1994 [AMASHUSHO]](https://ukwelitimes.com/uploads/images/202604/image_430x256_69d4cdfe23b3a.jpg)
Ngoma: Mu Murenge wa Sake hibutswe Abatutsi bishwe muri Jenoside yakorewe Abatutsi mu Rwanda mu 1994
Kuri uyu wa Gatatu mu Murenge wa Sake mu karere ka Ngoma hibutswe Abatutsi biciwe mu Murenge wa Sake harimo n'abajugunywe mu kiyaga cya Mugesera muri Jenoside yakorewe Abatutsi mu Rwanda mu 1994.
Kuri uyu wa Gatatu tariki ya 8 Mata 2026, mu Murenge wa Sake, habereye igikorwa cyo Kwibuka ku nshuro ya 32 Jenoside yakorewe Abatutsi mu Rwanda mu 1994. Iki gikorwa cyabimburiwe n’urugendo rwo Kwibuka no kunamira inzirakarengane z’Abatutsi bishwe muri Jenoside, zirimo abajugunywe mu Kiyaga cya Mugesera ndetse n’abashyinguwe mu Rwibutso rwa Jenoside yakorewe Abatutsi mu Rwanda mu 1994 rwa Sake.
Abitabiriye igikorwa cyo kwibuka Jenoside yakorewe Abatutsi mu 1994 mu Murenge wa Sake bibukijwe ko Kwibuka atari inshingano z’abarokotse Jenoside gusa, ahubwo ari iya buri Munyarwanda wese, hagamijwe kubaka igihugu kirangwa n'ubudaheranwa bw'Abanyarwanda.
Mu butumwa bwatanzwe n'uwari uhagarariye IBUKA mu Karere Ngoma yagarutse ku kamaro ko kubungabunga amateka no gufasha abarokotse mu rugendo rw’isanamitima nyuma y'ibikomere byaturutse ku ngaruka za Jenoside yakorewe Abatutsi mu Rwanda mu 1994.
Umuyobozi w’Akarere ka Ngoma mu ijambo rye, yihanganishije abarokotse Jenoside yakorewe Abatutsi mu 1994 asaba abaturage bose gukomeza gusigasira ubumwe n’ubwiyunge bw’Abanyarwanda binyuze muri gahunda ya Ndi Umunyarwanda.
Meya Niyonagira yanasabye urubyiruko kugira uruhare rukomeye mu kumenya amateka yaranze igihugu kugira ngo bashobore guhangana n'abashaka kugoreka amateka. Yanasabye abaturage muri rusange gutanga amakuru y'ahakiri imibiri y’abishwe muri Jenoside yakorewe Abatutsi kugira ngo ishyingurwe mu cyubahiro, anabakangurira gukomeza kurwanya ingengabitekerezo ya Jenoside.
