Kinyarwanda
English
Swahili
Ngoma: Ba Ofisiye bakuru muri Polisi bo mu bihugu 9 bagaragarijwe uko hakemurwa amakimbirane
Aba Ofisiye bakuru biga mu Ishuri Rikuru rya Polisi, bakoreye urugendo shuri mu karere ka Ngoma, bagaragarizwa uburyo bukoreshwa mu gukemura amakimbirane no kubaka umuryango ushoboye kandi utekanye.
Kuri uyu wa Kane, tariki ya 26 Gashyantare 2026, nibwo aba Ofisiye bakuru biga mu Ishuri Rikuru rya Polisi ( National Police college). Ni urugendo shuri rwari rugamije guhuza amasomo bigira mu ishuri n’imikorere y’inzego z’ibanze mu kubaka amahoro no gukemura amakimbirane hashingiwe ku bufatanye n’abaturage.
Urugendo shuri rwari rufite insanganyamatsiko igira iti “Gushimangira uburyo bushingiye ku muryango mu gukemura amakimbirane hagamijwe amahoro n’umutekano birambye.”
Aba ba ofisiye bakuru muri Polisi z'ibihugu bitandukanye byo ku mugabane wa Afurika biga mu Ishuri Rikuru rya Polisi, basobanuriwe imikorere y’Inteko z’Abaturage n’izindi gahunda zigira uruhare mu gukemura ibibazo by’abaturage no kubaka umutekano urambye ushingiye ku bufatanye.
Umuyobozi w’Akarere ka Ngoma, Madamu Niyonagira Nathalie yashimiye ubuyobozi bw’ishuri Rikuru rya Polisi bwahisemo gukora urugendo shuri rwo kwigira ku Karere ka Ngoma anagaragaza ko abaturage ubwabo bagira uruhare mu kwishakira ibisubizo.
Yagize ati “Iyo abaturage bahabwa ijambo kandi bakagira uruhare mu kwishakira ibisubizo, amakimbirane akemuka hakiri kare kandi bikagabanya ibyaha n’imitwaro ku nzego z’ubutabera.”
Umuyobozi w 'ishuri Rikuru rya Polisi, CP Bizimungu Christophe mu ijambo rye, yagarutse ku mpamvu bakoze urwo rugendo shuri mu karere ka Ngoma.
Yagize ati: “Kwiga uburyo abaturage ubwabo bagira uruhare mu gukemura amakimbirane bituma abapolisi barushaho gusobanukirwa ko umutekano urambye wubakwa binyuze mu bufatanye n’abaturage.”
Abo ba Ofisiye bakuru muri Polisi biga mu Ishuri Rikuru rya Polisi, banasuye umurenge wa Kibungo n'uwa Murama, bareba uko gahunda zitandukanye zigira uruhare mu kubaka Umuryango ushoboye kandi utekanye no gukemura amakimbirane mu miryango, aho bagaragarijwe imikorere y’Umugoroba w’Umuryango, imikorere y'Abunzi na gahunda ya Mvura Nkuvure.
Iri tsinda ryakoreye urugendo shuri mu karere ka Ngoma ryari rigizwe n’aba ofisiye bakuru baturuka mu bihugu bya Eswatini, Gambia, Namibia, Malawi, Santrafurika, Somalia, Sudan y' Epfo, Uganda n'u Rwanda.
