Ku munota wa Kabiri gusa, Al Hilal Omdurman yabonye amahirwe ya mbere y'igitego ariko biranga. Ni umupira mwiza wazamukanwe na Girumugisha Jean Claude ahereza neza Sunday Damilare ariko ateye n'umutwe umupira ujya hanze y'izamu.

Ku munota wa 5, ikipe ya Al Hilal Omdurman yabonye ubundi buryo ariko biranga. Ni umupira wazamukanwe na Coulibali aciye ku ruhande rw'iburyo ariko umupira abasore ba Mukura Victory Sports bawushyira hanze, Koroneri itewe ntiyagira ikivamo.

Ku munota wa 6, Mukura Victory Sports yabonye nayo Koroneri nziza nyuma y'umupira wari uzamukanwe na Iradukunda Elie Tatou ariko ateye umupira ujya hanze y'izamu ntakibazo iteje.

Ku munota wa 15, ikipe ya Al Hilal Omdurman yabonye ikarita y'umutuku yahawe Petrus Aprecius. Ni ikosa ryakoreye kuri Boateng Mensah nyuma yo kumwambura umupira mwiza akawusunika rimwe ariko bikarangira Petrus Aprecius akoze ikosa ahita ahabwa ikarita y'umutuku.

Ku munota wa 24, ikipe ya Al Hilal Omdurman yakoze impinduka umutoza wayo yinjiza mu kibuga Steven Ebuela akuramo Kindness Cole. Umutoza Laurentiu Aurelian wabonaga igitekererezo afite ari ukwataka kugira ngo arebe ko yabona igitego.

Ku munota wa 26, ikipe ya Mukura Victory Sports yabonye amahirwe igitego kirabura. Ni umupira waturutse kuri Zuberi ahereza Boateng Mensah ariko ateye umuzamu nta wurimo umupira uca ku ruhande gato rw'izamu ririnzwe na Mohamed Madani.

Ku munota wa 35, Al Hilal Omdurman y'abakinnyi 10, yongeye kubona uburyo bukomeye ntibwabyazwa umusaruro. Ni umupira mwiza Steven Ebuela yahanahanye na Sunday Damilare ariko umuzamu Sebwato ahita awufata neza.

Ku munota wa 41, ikipe ya Mukura Victory Sports yahushije uburyo bukomeye. Ni umupira mwiza wazamukanwe na Iradukunda Elie Tatou acenga yinjira mu rubuga rw'umuzamu ariko ateye ishoti umupira uca ku ruhande gato rw'izamu.

Ku munota wa 45, mbere yuko bongeraho iminota y'inyongera, Al Hilal Omdurman yatsinze igitego cya mbere. Ni igitego cyatsinzwe na Adama Coulibali ku mupira mwiza yari ahawe na Elihadj Madicke Kane.

Igice cya mbere cyarangiye ikipe ya Al Hilal Omdurman yatsinze igitego 1-0. Ni igice Mukura Victory Sports yagerageje gukina neza nubwo yagiye ihusha uburyo bukomeye bwagombaga kuvamo ibitego birenze kimwe.

Igice cya Kabiri cyatangiranye impinduka ku ruhande rwa Mukura Victory Sports. Umutoza Canisius akuramo Ishimwe Abdul na Joseph Sackey yinjizamo Tuyishime Emmanuel hamwe na Malanda Destiny. 

Ku munota wa 55, ikipe ya Al Hilal Omdurman yahushije uburyo bukomeye. Ni umupira mwiza wazamukanwe na Adam Coulibali acenga ba myugariro ba Mukura Victory Sports ageze iruhande rw'izamu ahereza Girumugisha Jean Claude arawuhusha birangira ugiye hanze.

Ku munota wa 59, ikipe ya Al Hilal Omdurman yakoze impinduka umutoza Aurelian akuramo Ernest Luzolo na Sunday Damilare yinjiza mu kibuga abarimo Gussouma Fofana ndetse na Abdallah Mamoun.

Ku munota wa 63, ikipe ya Mukura Victory Sports yahushije uburyo bwari bwabazwe. Ni umupira watakajwe n'abasore ba Al Hilal Omdurman ufatwa na Iradukunda Elie Tatou ateye ishoti umupira ukorwaho n'abasore ba Al Hilal Omdurman ujya muri koroneri ipfusha ubusa ayo mahirwe yari ibonye.

Ku munota wa 67, ikipe ya Mukura Victory Sports yongeye gukora impinduka umutoza Pierre Canisius akuramo Niyonizeye Fred ashyiramo Ndimbumba Jordan Nzau. Al Hilal Omdurman nayo yakoze impinduka umutoza akuramo Girumugisha Jean Claude ashyiramo Emmanuel Flomo.

Ku munota wa 74, ikipe ya Al Hilal Omdurman yabonye igitego cya Kabiri. Ni igitego cyatsinzwe na Emmanuel Flomo ku mupira mwiza yazamukanye aciye ku ruhande rw'iburyo atera ishoti umuzamu Sebwato ayoberwa aho umupira uciye 

Ikipe ya Mukura Victory Sports yakomeje kugenda yataka kugira ngo irebe ko yabona igitego cyo kwishyura ariko biranga. Iyi kipe yabonye uburyo bwa Kufura ariko itewe umupira uca hanze gato y'izamu.

Umukino wahuzaga Mukura Victory Sports na Al Hilal Omdurman warangiye ikipe ya Al Hilal Omdurman ibonye intsinzi y'ibitego 2-0. Ni Mukura Victory Sports wavuga ko yirangayeho ariko igorwa cyane n'imikinire yo guhanahana Al Hilal Omdurman yari yazanye kuri uyu mukino.