Uyu muhango wabereye mu biro bya Minisiteri y’ububanyi n’amahanga, aho Minisitiri yashimye ubufatanye bwiza FAO isanzwe igirana na Leta y’u Rwanda, cyane cyane mu guteza imbere ubuhinzi, ubworozi n’umutekano w’ibiribwa. 
Yagaragaje ko ubuhinzi bukomeje kuba inkingi y’iterambere ry’ubukungu bw’igihugu, bityo ubufatanye n’abafatanyabikorwa mpuzamahanga nka FAO bukaba ingenzi mu gushyigikira gahunda za Leta zigamije kongera umusaruro no guhangana n’imihindagurikire y’ibihe.
Ku ruhande rwe, Bwana Mohamed Yusuf Aw-Dahir yashimye icyizere yagiriwe ndetse anashimangira ko azakomeza gushimangira ubufatanye hagati ya FAO n’u Rwanda. Yavuze ko azibanda ku gushyigikira gahunda z’igihugu zigamije kurandura inzara, guteza imbere ubuhinzi burambye no kuzamura imibereho myiza y’abaturage.
Iyakirwa ry’uyu muyobozi mushya rishimangira umubano mwiza hagati y’u Rwanda na FAO, ndetse rikaba intambwe nshya mu gukomeza ubufatanye mu rugendo rwo kugera ku iterambere rirambye n’umutekano w’ibiribwa ku baturage bose.