Kinyarwanda
English
Swahili
Masisi ikomeje kuba isibaniro: AFC/M23 na FARDC baramukiye mu mirwano ikaze
Mu Ntara ya Kivu y’Amajyaruguru muri Repubulika Iharanira Demokarasi ya Congo hakomeje kuvugwa imirwano ikomeye hagati y’impande zitandukanye zishyamiranye, ibintu bikomeje guteza impungenge ku mutekano w’abaturage.
Kuri uyu wa 27 Gashyantare 2026, amakuru aturuka mu gace ka Kinyumba mu karere ka Masisi aravuga ko habaye imirwano hagati y’inyeshyamba za AFC/M23 n’ihuriro rigizwe n’ingabo za Leta ya Congo, FARDC, zifatanyije n’imitwe y’abaturage yitwara gisirikare izwi ku izina rya Wazalendo na FDLR.
Iyi mirwano ibaye mu gihe aka gace gafatwa nk’ah’ingenzi mu bya gisirikare n’ubukungu kongera kubamo umutekano muke, bikaba byongera impungenge ku ituze ry’intara ya Kivu y’Amajyaruguru muri rusange.
Ku munsi wabanje, tariki ya 26 Gashyantare 2026 ahagana saa kumi n’ebyiri z’umugoroba, hari igitero cyagabwe hifashishijwe drone yateye igisasu mu gace ka Isiro, mu mujyi wa Nyabyondo, na wo uherereye muri Masisi.
Abasesenguzi mu bya gisirikare bavuga ko ikoreshwa rya drone mu bitero bishobora kugaragaza ihinduka rikomeye mu buryo imirwano iri kugenda irushaho gukomera, ndetse bikaba byatuma intambara irushaho gufata indi ntera haba mu bukana no mu bwaguke bw’aho igera.
Kugeza ubu, nta mibare iratangazwa ku bahitanywe cyangwa abakomeretse muri ibyo bitero, ariko abaturage batuye muri utu duce bakomeje guhunga bashaka ubuhungiro mu duce dutekanye kurushaho.
