Ku isaha ya saa cyenda n'iminota ine, nibwo umukino watangiye. ni umukino watangijwe na Rayon Sports yari yasuye APR FC kuri sitade Amahoro. Uyu mukino watangiye ubona muri Sitade abafana ku mpande zombi bakinjira ndetse ubona ko hari igice kinini kitarimo abafana.

Ku munota wa Gatatu, ikipe ya Rayon Sports yakorewe ikosa rikomeye nyuma yaho Bigirimana Abedi yari azamukanye umupira ahita akorerwa ikosa, ihawe kufura ntiyagira ikivamo.

Ku munota wa 5, APR FC nayo yabonye amahirwe yo kubona igitego ku mupira mwiza wazamukanywe na Dauda Yusif mu kibuga hagati ateye ishoti umupira uca ku ruhande gato y'izamu ririnzwe na Pavelh Nzilla wa Rayon Sports.

Ku munota wa 7, APR FC  yabonye amahirwe akomeye yo kubona igitego ariko biranga. Ni umupuira mwiza Ruboneka yahaye Hakim Kiwanuka ajyeze mu rubuga rwa Rayon Sports   Musore ahita awurenze. ikuipe yaje gutera Koroneri ariko ntiyagira ikivamo gikomeye.

Ku munota wa 10, Rayon Sports yabonye uburyo bw'igitego ariko ibupfusha ubusa. Ni umupira Serumogo Ally yazamukanye ahereza Bigirimana Abedi ateye ishoti umupira uca ku ruhande gato. 

Ku munota wa 16, Ikipe ya Rayon Sports yahushije uburyo bwa mbere wavuga ko bukomeye. ni uburyo bwakozwe na Musore Prince wari uhawe umupira mwiza na Ndayishimiye Richard ahereje bagenzi be umupira uhita ukurwamo neza na Ronald Ssekiganda.

Ku munota wa 20, ikipe ya APR FC wabonaga irimo kugerageza uburyo bwa kure, Dauda Yusif yongeye gutera ishoti rikomeye ariko Pavelh Nzilla awufata nta kibazo afite.

Ku munota wa 22, Rayon Sports yabonye amahirwe akomeye yo gutsinda igitego ariko ba rutahizamu bayo bayapfusha. Ni umupira mwiza wari uhawe Aziz Bassane ateye ishoti ufatwa neza na Ishimwe Jean Pierre wa APR FC.

Ku munota wa 24, APR FC yongeye kugerageza uburyo bukomeye. Ni umupira wazamukanwe na Ronald Ssekiganda ahereza Mugisha Gilbert ateye ishoti ukurwamo neza na Serumogo Ally. Iyi kipe yeteye Korioneri ya mbere ikurwamo na Pavelh Nzilla, bateye iya kabiri ihita ivamo igitego.

Ni igitego cyabonetse ku munota wa 26, gitsinzwe na Ronald Ssekiganda. Wari umupira mwiza utewe na Ruboneka Jean Bosco uyu Muganda ahita aterekaho umutwe mwiza.

Uko byifashe guhera mu minota 30 y'igice cya mbere

Ku munota wa 32, ikipre ya APR FC yakorewe ikosa rikomeye muri metero 30 uvuye ku izamu ririnzwe na Pavelh Nzilla. Iyi kipe yahise ihabwa kufura nziza cyane, itewe Yousou Diagne ahite ashyira umupira muri Koroneri itewe ntiyagira ikivamo gikomeye.  

APR FC yatsinze igitego cya kabiri gitsinzwe na William Mel Togui. Ni igitego cyabonetse ku munota wa 37 ku mupira wari utewe na Hakim Kiwanuka maze Pavelh Nzilla awukuramo usanga aho William Mel Togui ahagaze ahita atsinda igitego cya kabiri.

Ku munota wa 44, APR FC yabonye amahirwe yo gutsinda igitego cya gatatu ariko umusifuzi Diedonne ahite yemeza ko habayemo kurarira nubwo umupira n'ubundi wari utewe na William Togui ugakubita ipoto.

Igice cya mbere hagati ya APR FC na Rayon Sports cyarangiye ikipe ya APR FC itsinze ibitego 2-0. Ni igice ikipe ya Rayon Sports wabonaga iri hasi cyane ndetse igenda itakaza imipira cyane wabonaga ifite igihunga cyinshi. Iki gice ariko APR FC yakinnye neza wabonaga yari ifite amahirwe yo gutsinda ibitego birenze bibiri ariko biranga.

Rayon Sports yatangiranye impinduka muri iki gice kabiri, umutoza Aruna Feruzi yinjiza mu kibuga abarimo Ishimwe Fiston, Rushema Chris ndetse na Tony Kitoga. Abavuye mu kibuga barimo Niyonzima Olivier Sefu, Serumogo Ally ndetse na Habimana Yves.

Ku munota wa 46, ikipe ya Rayon Sports yatangiranye imbaraga nyinshi. Iyi kipe yatangiye ihusha uburyo bukomeye ku mupira mwiza watewe na Richard Ndayishimiye ariko Ishimwe Pierre ahita awushyira muri Koroneri, itewe ntiyagira ikivamo.

Ku munota wa 61, Ikipe ya Rayon Sports yatakaje umukinnyi wayo witwa Tambwe Gloire nyuma yo kugira imvune ndetse ihita inatuma asohoka mu kibuga hinjiramo Harerimana Abdoul Aziz.

Ku munota wa 68, ikipe ya APR FC yakoze impinduka umutoza Denis Omedi na Mamadou Sy binjira mu kibuga hasohokamo Mugisha Gilbert na William Mel Togui.

Ku munota wa 70, APR FC nyuma yo kwinjizamo aba basore yabuze igitego ku mupira mwiza wari utewe na Mamadou Sy ariko ukubita ipoto uvamo habura undi usubizamo.

Rayon Sports nayo ku munota wa 72, yabonye uburyo bukomeye bwazamukanwe na Musore Prince ateye Santire nziza umupira ufatwa na Harerimana Abdoul Aziz ariko gutera mu izamu biranga.

Ku munota wa 79, APR FC yakoze izindi mpinduka, Abderrahim Taleb akuramo Hakim Kiwanuka utari uhagaze neza yinjiza mu kibuga Iraguha Hadji utaherukaga kubona umwanya wo gukina muri iyi mikino ya shampiyona.

 Ku munota wa 84, ikipe ya Rayon Sport yakoze impinduka akuramo Tony Kitoga yinjizamo Sindi Paul Jesus. Ikipe ya APR FC nayo yakoze impinduka Kapiteni Niyomugabo Claude avamo hinjiramo Bugingo Hakim.

Umusifuzi w'umukino yongeyeho iminota 5

 Ikipe ya APR FC yatangiye gucungana n'iminota y'inyongera ndetse ubona ko umupira utangiye gukinirwa hagati mu kibuga. 

Ku munota wa 93, APR FC yabonye igitego cya gatatu gitsinzwe na Mamadou Sy. Ni igitego cyabonetse nyuma y'uburangare bwa ba myugariro ba Rayon Sports umupira ufatwa na Seidu Dauda Yusif ahereza neza Mamadou Sy yisanga wenyine ahita atereka mu izamu.

Umukino waje kurangira ikipe ya APR FC itsinze ibitego 3-0. Ni umukino twabonye Rayon Sports ibura ibyo ikora kuko ubaze inshuro yateye mu izamu ntabwo zirenze ebyiri gusa mu gihe APR FC yabuze uburyo wavuga burenga 6 bwose bwabazwe.