Mu kwezi gushize nibwo Lamine Yamal yashyize hanze amashusho ari kumwe n'abagenzi be, Nico Williams, na Samu Omorodion babyina indirimbo 'Shake Body' ya Skales, ubwo bari mu ikipe y’igihugu ya Espagne.

Aya mashusho Lamine Yamal yashyize ku mbuga nkoranyambaga ze nka TikTok, yarakunzwe cyane biza no gutuma iyi ndirimbo imaze imyaka 10 igiye hanze yongera gukundwa na benshi cyane cyane muri Espagne.

Nyuma y'uko aya mashusho agiye hanze, indirimbo 'Shake Body' yakomeje kugenda yongera imibare y'abayumva ku mbuga zicuruza imiziki zirimo nka Apple Music na Spotify.

Imibare igaragaza ko nyuma y'uko Lamine Yamal n'abagenzi be bagaragaye babyina iyi ndirimbo, kugeza ubu imaze kumvwa n'abagera kuri miliyoni 150 ku mbuga zitandukanye zicuruza imiziki. Igereranya rikorwa na bimwe mu bitangazamakuru byo muri Nigeria, rivuga ko uyu muhanzi ashobora kuba amaze gukuramo arenga ibihumbi $100 (arenga miliyoni 140 Rwf).

Uretse kandi kwamamara kw'iyi ndirimbo byatumye Skales agenderera Espagne yisanga ndetse ahura n'umuryango wa Lamine Yamal, kuko yanagaragaye abyina ari kumwe na Sheila Ebana, nyina wa Lamine Yamal.

Skales kandi ubwo yitabiraga umukino wa nyuma w'igikombe cy'umwami muri Espagne, warangiye FC Barcelona itsinze Real Madrid ibitego 3-2, ikanatwara iki gikombe, yahuye na Lamine Yamal n'abagenzi be bakinana ubwo bishimiraga iki gikombe ndetse abaririmba imbonankubone.

Skales yagaragaye ari kubyina hamwe na nyina wa Lamine Yamal