Ubwo Mitsutsu n'abo bakorana bari mu gitaramo cy'urwenya cya Gen Z noneho Mitsutsu atangira kwamamaza abafatanyabikorwa be nyamara bitemewe kuko abo yamamazaga bakora ibisa nk'iby'abafatanyabikorwa na Gen Z.

Yari yemerewe iminota 40 ariko amaze gukora isaga 30. Bivuze ko yakuwe ku rubyiniro asigaje iminota 10. Muri icyo gitaramo amashusho ya Mitsutsu azimirizwaho indangururamajwi yafashwe na Ag Promoter ayasakaza ku mbuga nkoranyambaga, ibintu bitashimishije Mitsutsu. 

Bukeye rero Mitsutsu yakoze ikiganiro avuga ko ifatwa ry'ayo mashusho ritamunejeje niko gukomeza kuvuga ko Ag Promoter agambiriye kumugirira nabi.

Killaman rero nk'umwe mu bagize uruhare mu kuzamuka ku izina rya Mitsutsu, yarabegereye bose arabaganiriza asanga nta kibazo gikomeye bari bafitanye ku buryo batakwiyunga. Ku wa 15 Kanama 2025 mu kiganiro kihariye Killaman yabwiye Ukwelitimes.com ko yahosheje amakimbirane. Ati"Bariya bose ni abana banjye ni nayo mpamvu wumvise banyita Dady. Narabicaje ndabumva bose ndabahuza. Ubu byararangiye nta kibazo bafitanye".

Killaman ni umwe mu bakinnyi wa filime bakunzwe kandi akaba agira uruhare mu kuzamura abanyempano muri sinema nyarwanda.