Ibi abatwara abagenzi kuri moto babisabiwe mu Bukangurambaga bwabaye muri gahunda ya Gerayo Amahoro bwabereye mu karere ka Kamonyi kuri uyu wa Mbere Tariki ya 23 Gashyantare 2026. Polisi y'Igihugu mu karere ka Kamonyi yakanguriye abatwara abagenzi kuri moto gufata iya mbere mu kugira uruhare mu gukumira ibyaha birimo gukwirakwiza ibiyobyabwenge nkuko byatangajwe n'Imvaho Nshya dukesha iyi nkuru.

Polisi y'Igihugu mu karere ka Kamonyi yibukije abamotari ko bafite inshingango yo kugenzura imizingo y'abagenzi batwara ndetse banamenyeshwa ko uwuzafatwa atwara ibitemewe, moto  azaba atwaye izafatwa ndetse nawe agahanwa nk'uwabitwaye akanagira uruhare mu kubikwirakwiza.

Muri ubwo bukangurambaga, Polisi y'Igihugu yagaragaje ko hari abakora ibyaha bifashisha abakora umwuga wo gutwara abagenzi kuri moto gukwirakwiza ibitemewe mu gihe bashaka kubigeza ku babirangura nabo by'umwihariko abakoresha imihanda yo mu mirenge ya Ngamba n'uwa Rukoma.

SSP Furaha Fulgence umuyobozi wa Polisi y'Igihugu mu karere ka Kamonyi, avuga ko abamotari bakwiye kugaragaza uruhare rwabo mu gukumira ibyaha bikorwa n'ababikwirakwiza bifashishije abo bamotari ndetse anabasaba kurangwa n'ubushishozi mu mikorere yabo.

Ubukangurambaga bwa Gerayo Amahoro, bukorerwa mu bice bitandukanye by'Igihugu, abakoresha umuhanda bagakangurirwa kuwukoresha neza mu rwego rwo gukumira impanuka zibera mu muhanda zituruka ku gukoresha nabi umuhanda.