Ibi bitego byose Chelsea FC irimo gushinjwa ni ibyakozwe mu gihe iyi kipe yayoborwaga na Roman Abramovich wambuwe iyi kipe kubera intambara y'uburusiya na Ukraine.

FA yagize iti " Ishyirahamwe ry’Umupira w’Amaguru ryashinje Chelsea FC kurenga ku mategeko ajyanye n’abajyanama b’abakinnyi, amategeko ajyanye n’abahuza, ndetse n’amategeko arebana n’ishoramari ry’abanyamahanga mu bakinnyi."

Aya makosa avugwa ko yakozwe hagati ya 2009 na 2022, ariko cyane cyane hagati ya 2010-2011 na 2015-2016. Chelsea FC yamenyeshejwe ko igomba gutanga ibisobanuro bitarenze tariki 19 Nzeri 2025.

Chelsea FC nyuma yo kubona ibi birego yahise isohora itangazo ivuga ko ubuyobozi bushya bw’ikipe bwaguze Chelsea ku wa 30 Gicurasi 2022 bwabonye ko hari amakuru y’imari atari yuzuye ndetse n’amakosa y’amategeko yakozwe mbere.

Ibi byose byahise bitangazwa n’ikipe ku nzego zose zirebwa n’aya makosa, harimo na FA. Chelsea yavuze ko yakoranye neza n’ishyirahamwe ry’umupira w’amaguru, itanga dosiye n’amakuru yose asabwa. Yanavuze ko ibi birego byose birebana n’ibyakozwe mu myaka irenga icumi ishize.

Nk’uko bitangazwa n'ibinyamakuru bitandukanye byo ku mugabane w'i Burayi, bitangaza ko Chelsea ishobora guhabwa ibihano bikomeye harimo no kugabanyirizwa amanota mu gihe yaba ihamwe n'ibi birego.

Ibi bije mu gihe Chelsea FC irimo kwitegura umukino ifitanye na Brentford ku wa Gatandatu tariki 13 Nzeri 2025.