Igitaramo kiswe 'The Ben Live Concert" mu mujyo wo kwamamaza Album yitwa  Plenty Love. Igitaramo cyarimo abahanzi, abanyarwenya, ababyinnyi, itorero na DJ Flix wacuranze bikanezeza abitabiriye.

Nubwo igitaramo ari icya The Ben ariko yahaye rugari barumuna be nabo biyereka abafana ku buryo ubutaha bazajya bakora nabo ibitaramo binini bakava ku rwego rwo gutaramira mu tubari. Green P, Element Eleéh, Kevin Kade, Levixone, Rema Namakula n'abandi batandukanye bitwaye neza imbere y'abafana bari bizihiwe bigaragarira buri wese.

Igitaramo cyarangijwe na The Ben, berekeza Maison Noire naho hari huzuye ku buryo gutambuka byasabaga kwihengeka. Muri rusange umuziki nyarwanda urakunzwe I Kampala ku buryo ari amahirwe abahanzi bakwiriye gufata ntibarekure.

Icyakora bimwe mu bitaragenze neza n'ukubahiriza amasaha yo gutangira igitaramo. Ku itiki hari handitseho saa kumi n'ebyiri ariko nibura saa moya nibwo abambere bemerewe kwinjira. Hari abaje saa munani kugirango bafate imyanya y'imbere ariko batungurwa no gutegereza kugeza izo saa moya.

Ubwitabire bwari bwinshi dore ko hari hateganyijwe abantu 1500 ariko hari abahagaze babuze Aho bicara Cyangwa se wenda batashakaga kwicara kuko igitaramo cyaranzwe no kubyina, kuririmbana n'abahanzi rimwe na rimwe bakarusha ijwi ba nyiri indirimbo bitewe n'ibyishimo.

Abanyarwandakazi iyo bagukunda uracuruza

Iyo abakobwa b'abanyarwandakazi bagukunda uri umuhanzi byorohera abacuruzi kugutumira kuko nibo bakurura abagabo bafite amafaranga bakeneye kuyarya. Uhereye mu myanya ya miliyoni enye kugeza ku byicaro by'amashilingi 150,000 ndetse no muri Maison Noire hari huzuye abanyarwandakazi.

The Ben, Kevin Kade na Element Eleéh bakoreye amateka muri Uganda