Ni ibyatangajwe mu itangazo ryashyizwe hanze n’ibiro bya Diyosezi Gatolika ya Gikongoro rishyizweho umukono na Myr Eugène Dushimurukundo, igisonga cy’Umwepiskopi wa Gikongoro.

Bimwe mu bikubiye muri iri tangazo ni uko Musenyeri Selestini Hakizimana, Umwepiskopi wa Diyosezi Gatolika ya Gikongoro, yagaragaje ko afatanyije n’umuryango wa nyakwigendera Padiri Bernard Kyoribona mu bihe bitoroshye barimo byo kubura umuvandimwe, anihanganisha abakristu ndetse n’abavandimwe ku bw’inkuru y’akababaro y’urupfu rwe.

Nyakwigendera Bernard Kyoribona, wari Padiri mukuru wa paruwasi ya Kirambi, yaguye mu Bitaro Bikuru bya Kaminuza bya Butare (CHUB), kuri iki Cyumweru tariki ya 19 Mata 2026 aho yari amaze iminsi yitabwaho n’abaganga, mu gihe itariki yo kumusezeraho no kumushyingura izatangazwa nk’uko iryo tangazo ryabivugaga.

Ni itangazo risoza Diyosezi Gatolika ya Gikongoro isaba abakristu, abapadiri, abiyeguriye Imana ndetse n’inshuti za Padiri Bernard Kyoribona gukomeza kwifatanya n’umuryango we muri ibi bihe bikomeye by’akababaro.