Kinyarwanda
English
Swahili
Huye: Mu bikorwa by’umuganda hatewe ibiti birenga 4,500 ku buso bwa hegitari 4.5
Kuri uyu wa Gatandatu tariki ya 25 Ukwakira 2025, mu Karere ka Huye habereye umuganda rusange usoza ukwezi, aho abaturage, inzego z’ibanze n’abafatanyabikorwa batandukanye bahurije hamwe imbaraga mu bikorwa byo gutera ibiti no kurengera ibidukikije.
Uyu muganda wabereye ku rwego rw’Akarere mu Murenge wa Ngoma, Akagari ka Butare, Umudugudu wa Karubanda, ahatewe ibiti birenga 4,500 ku buso bwa hegitari 4.5.
Ni igikorwa cyari cyateguwe ku bufatanye bw’imiryango itandukanye irimo Youth of Destiny Rwanda, UR Huye Environmental Club, Kaminuza y’u Rwanda ishami rya Huye, Mastercard Foundation, Ingabo z’Igihugu zikorera muri Huye, ndetse n’ubuyobozi bw’Akarere ka Huye. Iki gikorwa cyari cyahurije hamwe izo nzego zose imbaraga kikaba cyari gifite insanganyamatsiko ya “Turinde, dusigasire ibidukikije.”
Ku rundi ruhande, ibindi bikorwa by’umuganda byabereye mu midugudu itandukanye y’Akarere ka Huye, aho abaturage bibanze ahanini ku gutera ibiti ku masite yari yateganyijwe hagamijwe kurwanya isuri no guteza imbere ubusitani muri uwo Mujyi wa Huye.
Nyuma y’umuganda, Umuyobozi w’Akarere ka Huye, Ange Sebutege, yashimye ubwitabire bw’abaturage n’abafatanyabikorwa, abibutsa ko umuganda ari umusingi w’iterambere rirambye ku banya-Huye ndetse no ku banyarwanda bose.
Yagize ati "Turabasaba gukomeza gukora cyane, mwiteze imbere no gukunda isuku. Tugomba kandi gushyigikira gahunda yo kugaburira abana ku ishuri, abana baretse ishuri tukabasubizayo, by’umwihariko buri muturage wese agomba kumva ko agomba kwitabira gahunda yo kubona irangamuntu nshya ubu zigiye gutangira gukorwa kugira ngo ntihazagire ucikanwa n’amahirwe yo kwinjira mu bikorwa bya Leta.”
Muri uyu muganda kandi, Umuryango Ubumwe Nyarwanda w’Abatabona (RUB) wifatanyije n’abatuye Umurenge wa Ngoma mu gikorwa cyo gutera ibiti. Ibi bikaba byabaye kimwe mu bikorwa byo kwitegura ubukangurambaga ku Nkoni Yera buzabera mu Karere ka Huye ku itariki ya 07 Ugushyingo 2025.
Abaturage baganiriye na UKWELI TIMES bavuze ko ibikorwa by’umuganda bibafasha gusigasira ibidukikije no guteza imbere ubumwe n’imikoranire hagati y’inzego zitandukanye.
Dushimimana Tasien ati “Twishimiye kuba twafatanyije n’abanyeshuri, ingabo zi gihugu n’abafatanyabikorwa mu karere mu gikorwa cyiza nk’iki cy’umuganda. Urebye gutera ibiti ni ugushyira ahabona urukundo dufitiye igihugu cyacu.”
Kugeza ubu mu Karere ka Huye kuva uyu mwaka watangiye muri Mutarama 2025, mu bikorwa by’umuganda rusange hamaze guterwa ibiti birenga ibihumbi 20 byagiye biterwa ku nkengero z’imihanda mu bice bitandukanye by’Ako karere.
