Iyi minisiteri ifite intego yo guteza imbere urubyiruko no gushyigikira ubuhanzi mu Rwanda, igaragaza ko ayo marushanwa ya YouthConnekt 2025 na ArtsConnekt 2025 yatangijwe ku bufatanye n’Ishami ry’Umuryango w’Abibumbye ryita ku Iterambere, UNDP n’Umuryango w’Ubumwe bw’u Burayi, EU.

Mur iki gihe hakomeje igikorwa cyo kwiyandikisha ku rubyiruko rufite imishinga, cyatangijwe ku wa 13 Kanama 2025 kikazarangira ku wa 30 Nzeri 2025.

Amarushanwa ya YouthConnekt Awards areba ibyiciro bitandukanye birimo ICT, Ubuhinzi (AgriConnekt), Inganda (Manufacturing), n’Ibindi bikorwa bya serivisi. Hari n’ibyiciro byihariye birimo icy’abafite ubumuga n’icy’abagore mu gihe ArtsConnekt yo irebana n’ubugeni mu muziki n’imbyino (Performing Arts), Ubugeni Mberajisho (Visual Arts), n’Ubuvanganzo.

Biteganyijwe ko umuntu wa mbere muri buri cyiciro azahabwa miliyoni 15 Frw, uwa Kabiri ahabwe miliyoni 12 Frw mu gihe uwa Gatatu we azahabwa ni Miliyoni 8 Frw, 

Ni mu gihe kandi igihembo gito kiba ari miliyoni 1 Frw yo guherekeza uwitabiriye ayo marushanwa. 

Biteganyijwe ko Abafite ubumuga n’abagore uwa Mbere azahembwa  Miliyoni 5 Frw.

Biteganyijwe ko nibura muri aya marushanwa hazahembwa urubyiruko 270 mu Gihugu hose ndetse abatoranyijwe ku rwego rw’Akarere bazahabwa amahugurwa n’abajyanama mu gutunganya imishinga.

Byitezwe ko aya marushanwa yitezweho gutanga amahirwe yo kwihangira imirimo no guhanga udushya no gushyigikira ubukungu bushingiye ku buhanzi n’ubudasa bw’urubyiruko.

Urubyiruko rwose ruri hagati y’imyaka 18–30 rufite imishinga rwasabwe kwiyandikisha, banyuze ku mbuga nkoranyambaga za Minisiteri y’Urubyiruko n’Iterambere ry’Ubuhanzi.

Muri Gashyantare 2025, Minisiteri y’Urubyiruko n’Iterambere ry’Ubuhanzi yatangaje ko mu marushanwa ya YouthConnekt 2024 hakoreshejwe arenga miliyoni 500 Frw mu guhemba abayitabiriye guhera ku rwego rw’Umurenge kugera ku rw’Igihugu.