Kinyarwanda
English
Swahili
Abapolisi bagera ku 1,697 basoje amasomo yihariye ku mutekano
Kuri uyu wa 24 Mata 2026, Umuyobozi Mukuru wa Polisi y’u Rwanda wungirije ushinzwe ibikorwa, Vincent Sano, yasoje ku mugaragaro icyiciro cya 4/26 cy’amahugurwa y’ibanze yihariye ahabwa abapolisi azwi nka Basic Police Special Forces Course.
Aya mahugurwa yamaze amezi atatu abera mu kigo cya Polisi gitangirwamo amahugurwa yo kurwanya iterabwoba (CTTC) giherereye i Mayange mu Karere ka Bugesera. Yitabiriwe n’abapolisi 1,697, barimo ab’igitsinagore 312, ndetse n’abagera kuri 38 baturutse mu Rwego rw’Igihugu rushinzwe Igorora.
Mu ijambo rye, CP Sano yashimye abasoje aya mahugurwa ku bwitange bagaragaje, anabibutsa ko ubumenyi n’ubushobozi bungutse bugomba gukoreshwa mu kurushaho kurinda umutekano w’abaturage no guhangana n’ibyaha by’umwihariko birimo iterabwoba.
CP Sano yashimiye abitabiriye aya masomo adasanzwe ku mutekano
Aya mahugurwa yibanda ku kongerera abapolisi ubumenyi mu bikorwa byihariye birimo kurwanya iterabwoba, gucunga umutekano mu bihe bidasanzwe, ndetse no gukoresha ibikoresho bigezweho mu guhangana n’ibibazo by’umutekano.
Isozwa ry’iki cyiciro rishimangira umuhate wa Polisi y’u Rwanda mu gukomeza kubaka ubushobozi bw’abapolisi, hagamijwe gutanga serivisi nziza no kurushaho kubungabunga umutekano w’igihugu n’abagituye.
