Ibi bikubiye mu itangazako ishyirahamwe ry’umupira w’amaguru hano mu Rwanda, FERWAFA, yashyize ahagaragara kuri uyu wa Gatanu tariki 25 Mata 2026. Muri iri tangazo FERWAFA, ivuga ko ihannye by’agateganyo aba bakozi babiri bitewe n’imyitwarire idahwitse bagaragaweho.

Ku wa Gatatu tariki 23 Mata 2026, mu mukino ikipe ya Rayon Sports yanganyijemo na Gorilla FC, Ndatimana Olivier yagaragaye arimo gusuka ibisa n’ifu ivanze n’amasaka mu kibuga bigaragara ko hari imigenzo itari myiza yakoreraga mu kibuga. Ibi byatumye FERWAFA ifata umwanzuro wo kumuhagarika by’agateganyo mu  gihe Komisiyo ikiga kuri iki kibazo cye.

Mbere y’umukino w’umunsi wa 27 wa Shampiyona ikipe ya Amagaju FC yatsinzemo ikipe ya Musanze FC ibitego 2-0, Imurora Japhet yumvikanye arimo kuvugana na Habarurema Gahungu usanzwe afatira ikipe ya Musanze FC wumva yifuza ko yakoroshya ikipe y’amagaju FC ikabona intsinzi.

Imurora Japhet asanzwe ari umutoza wongerera imbaraga abakinnyi yageze mu Amagaju FC avuye muri Musanze FC.

Muri iri tangazo FERWAFA, igaragaza ko aba bantu babiri batemerewe kugera mu bice byose bigira aho bihurira n’umupira. Ibyo bice birimo urwambarariro, ndetse banabujijwe kwinjira mu gice cya tekiniki, kugeza igihe hazafatirwa icyemezo cya nyuma na Komisiyo ishinzwe Imyitwarire.

Ibi bihano bije nyuma y’ibiheruka guhabwa abakinnyi babiri barimo uwa APR FC, Dauda Yussif waciwe amande y’ibihumbi 100, nyuma yo gutinda kwinjira mu kibuga yikanze amarozi ndetse na Donga Bivula wa Etincelles FC waciwe amande y’ibihumbi 200.

Imurora Japhet nyuma yo kwerekeza mu Amagaju FC yahise ahanwa.


Ndatimana Olivier yahagaritswe by'agateganyo