Kinyarwanda
English
Swahili
FCC yamaganye ibirengo bya Congo kuri Perezida Joseph Kabila uri mu manza
Ihuriro ry’amashyaka rya FCC (Front Commun pour le Congo) muri Repubulika Iharanira Demokarasi ya Congo ryatangaje ko ritewe impungenge n’umwuka mubi wa Politiki uri muri iki gihugu n’uburyo Joseph Kabila yatangiye kuburanishwa bidaciye mu mucyo.
Ibi ni ibikubiye mu itangazo FCC yashyize hanze, ryamaganira kure urubanza ruregwamo Joseph Kabila wahoze ayobora RDC, watangiye kuburanishwa n’Urukiko Rukuru rwa Gisirikare mu kwezi kwa Nyakanga.
FFC ivuga ko gukurikirana Kabila bigamije kumusibira amayira muri politiki, ndetse uru rubanza rushobora guteza umwuka mubi muri politiki, kandi bikaba bishobora gutiza umurindi ibibazo biri muri iki gihugu.
Joseph Kabila aregwa ibyaha bikomeye birimo iby’intambara n’ibyibasira inyokomuntu, ibyaha bishingiye ku gushinjwa gufasha ihuriro rya AFC/M23 rikorera mu Burasirazuba bw’Igihugu.
Iri tangazo rikomeza rivuga ko Kabila ari impirimbanyi y’amahoro, ishyize imbere ubumwe bw’igihugu kandi ko yiteguye gukoresha ubunararibonye bwe mu miyoborere y’igihugu.
FCC iri mu mahuriro y’amashyaka akomeye atavuga rumwe n’ubutegetsi bwa perezida Felix Tshisekedi, rivuga ko ryafashe ingamba zikomeye zo kwamagana ryivuye inyuma ubu buryo bwo kugira ubutabera igikangisho cya politiki.
Iri tangazo kandi rihamagarira abanyagihugu guhuza imbaraga, kandi rigasaba ubutegetsi ko bugomba kubahiriza uburenganzira bw’ibanze bw’Abanyapolitiki bose, barimo n’abatavuga rumwe nabwo.
