Ku munsi wejo hashize tariki 21 mutarama 2025, hakomezaga imikino ya UEFA Champions League amwe mu makipe akomeye abona itike ya 1/8 cyirangiza andi atsindwa mu buryo butunguranye.

Umukino wasaga nk’uhatse iyindi wari ugomba guhuza ikipe ya FC Barcelona yari yasuye ikipe ya Benefica yo mu gihugu cya Portugal urangira ikipe ya FC Barcelona itsinze ibitego 5-4.

Ni umukino wakomereye cyane iyi kipe yo muri Esipanye kuko mu gice cya mbere yari yatsinzwe ibitego 3-1 ndetse itangira igice cya kabiri n’ubundi bikomeza kuba bibi kuko nubwo FC Barcelona yatangiye yishyura igitego kimwe ariko yahise yongera gutsindwa ikindi gitego bigera ku munota wa 75 yatsinzwe ibitego 4-2.

Mu minota 15 yaburaga kugirango umukino urangire, FC Barcelona niho yakoreye amateka atarakorwa n’indi kipe ku isi.

FC Barcelona ku munota wa 78 yatsinze igitego cya gatatu kuri Penalite yatewe neza na Robert Lewandowski naho nyuma y’iminota 8 gusa Eric Garcia yaje gutsinda igitego cyo kwishyura cya 4, Raphihna ku munota wa 96 aza gutsinda igitego cy’intsinzi kuri FC Barcelona cya 5.

Ikipe ya FC Barcelona ibi bitego yatsinze kuva ku munota wa 75, byatumye iba ikipe ya mbere muri Champions League yari yasohotse bikagera kuri uyu munota iri inyuma n’ibitego 2 ariko umukino ukarangira ibonye intsinzi.

Gutsinda kwa FC Barcelona byatumye ibona itike ya 1/8 n’amanota 18 aho iri ku mwanya wa 2 ikurikiye ikipe ya Liverpool FC itaratsindwa umukino n’umwe mu mikino 7 ya UEFA Champions League uyu mwaka.

Indi mikino yaraye ibaye ya UEFA Champions League

Ikipe ya Atletico Madrid yatsinze Bayern Leverkusen ibitego 2-1, Liverpool FC itsinda Lille ibitego 2-1, Bologna itsinda Borussia Dortumond ibitego 2-1, Juventus inganya na Club Brugge 0-0, PSV itsinda Red Star ibitego 3-2, Stuttgart itsinda Slovan ibitego 3-1, Monaco itsinda Aston Villa igitego 1-0 naho Atalanta itsinda Sturm ibitego 5-0.