Ni imirwano ikomeye yahanganishije impande zombi kuva mu gitondo cyo kuri uyu wa Gatanu taliki 09 Gicurasi 2025, ikaba yatumye abasivile batari bacye ngo bava mu byabo bagahunga.

Amakuru BBC ikesha abayihaye amakuru muri utwo duce, avuga ko iyi mirwano yatangiye kuva ahagana saa kumi n'imwe z'igitondo.

Iyi mirwano iravugwa mu gihe abarwanyi ba M23 bivugwa ko ku wa kane bafashe agace ka Katogota kari ku ntera ya kilometero 80 mu majyaruguru uvuye mu mujyi wa Uvira.

Umuturage witwa Elias Muhasha, yabwiye BBC ko abarwanyi ba M23 bafashe Katogota nyuma y'imirwano ikomeye yatangiye ku wa gatatu,gusa uruhande rwa M23 ntirwemeje cyangwa ngo ruhakane ko bageze i Katogota.

Ku rundi rundi ruhande, ngo hari abanyamakuru bo muri aka gace bemeje ko mu mirwano ya Lugezi/Rugezi kuri uyu wa gatanu abarwanyi ba Wazalendo bo mu mutwe wa Biloze Bishambuke ari bo barwanye  n’umutwe wa Twirwaneho.

Iyi mirwano ikomeje kuvugwa mu bice bitandukanye, mu gihe hari umuhate ugamije kugera ku mahoro hagati ya M23 na leta ya Kinshasa mu biganiro i Doha.