Corneille Nangaa, wahoze ayobora Komisiyo y’Amatora ya Repubulika Iharanira Demokarasi ya Congo (CENI) kuva mu 2015 kugeza mu 2021, yavuze ko Umuryango Mpuzamahanga uri mu bagize uruhare mu gutsinda kwa Félix Tshisekedi mu matora ya Perezida yabaye mu mpera za 2018.

Mu kiganiro yahaye umuyoboro wa YouTube wa Mario Nawfal, Nangaa yavuze ko Tshisekedi yagiye k'ubutegetsi atatowe n’abaturage, kandi ko imyaka isaga itandatu amaze ari Perezida yanzwe n’abatari bake bitewe n'ibibazo byaranze ubutegetsi bwe. 

Uyu mugabo ni we wari ushinzwe gutangaza ibyavuye mu matora yo mu 2018, aho yemeje ko Tshisekedi yatsinze n’amajwi 38.56%, akurikiwe na Martin Fayulu wagize 34.82%. Ariko kuri ubu, aravuga ko ibyavuye muri ayo matora bitari ukuri kwuzuye.

Abajijwe niba ataragize uruhare mu gutuma Tshisekedi atsinda, Nangaa yasobanuye ko ibyabaye atari umugambi we ku giti cye, ahubwo byari ibikorwa byahuriweho n’inzego zitandukanye za Leta ya RDC, zirimo Inteko Ishinga Amategeko, igisirikare, Guverinoma ndetse n’abafatanyabikorwa bo mu mahanga.

Yagize ati: "Sinateguye intsinzi ya Tshisekedi. Habayeho ubufatanye bw’inzego nyinshi. Komisiyo y’Amatora igira uruhare ariko hari n’izindi nzego, harimo na MONUSCO, ubutumwa bwa Loni, bwagize uruhare mu kwemera ko ibintu bigenda uko byagenze. Baravuze bati Ni bwo buryo bwiza."

Martin Fayulu, wakunze kuvuga kenshi ko yibwe intsinzi, akomeje kwemeza ko ari we Perezida wemewe n’abaturage, nubwo Tshisekedi ari we uri ku butegetsi kugeza ubu.

Corneille Nangaa avuga ko kujya k'ubutegetsi kwa Tshisekedi byagizwemo uruhare n'inzego zitandukanye