Uretse igihano cy’igifungo, Ubushinjacyaha bwasabye ko Mutamba amara iyi myaka adashobora gufungurwa by’agateganyo kandi atemerewe kugira uburenganzira bwo gukora mu nzego za Leta.

Umushinjacyaha Mukuru w’Urukiko, Sylvain Kalwila, yasabye ko uregwa ahamwa n’icyaha cyo kunyereza amafaranga yari agenewe kubaka gereza ya Kisangani mu Ntara ya Tshopo.

Mutamba yahakanye ibyaha, ashimangira ko byose bifite ishingiro rya politiki kandi bigamije kumuca intege ku mishinga myiza yari afitiye igihugu.

Ubushinjacyaha bwanasabye ko asubiza amafaranga yose mu isanduku ya Leta, kuko atagomba guhera.

Abamwunganira mu mategeko bo bavuga ko umukiliya wabo ari umwere, kandi ko ngo "biteye isoni ku kuba abakiri bato mu mategeko" basabira ibihano nka biriya uyu wahoze ari Minisitiri w’Ubutabera ngo "urengana." Basobanura ko amafaranga aregwa kunyerezwa akiri kuri konti, bityo kumushinja kuyanyereza ari ukumwambika urubwa.

Banongeyeho ko ibimenyetso byatanzwe n’Ubushinjacyaha bidahagije, basaba ko agirwa umwere nta mananiza.

Constant Mutamba yahoze ari Minisitiri w’Ubutabera muri Repubulika Iharanira Demokarasi ya Congo