Impunzi 18.432 z'Abanyekongo ziherutse kwimurwa zivanwa muri komini ya Gihanga (Bubanza) na Rugombo (Cibitoke) bimurirwa ahitwa Musenyi muri komini ya Giharo intara ya Rutana, zivuga ko kuva zahagezwa mu kwezi gushize nta mfashanyo barabona.

SOSmedia Burundi, itangaza ko hari abifuza kuba basubira muri Congo bakicwa n’amasasu aho kwicwa n’inzara.

Umwe ati: "Twahitamo gusubira iwacu tugapfa tuzize amasasu aho kwicwa n'inzara hano".

Umukozi ushinzwe ubuzima ukorera muri aka karere, avuga ko niba nta  gikozwe vuba, hazaba ikibazo  gikomeye cy'ubuzima."

 Uhagarariye Komisiyo y’umuryango w’abibumbye wita ku mpunzi (UNHCR), yemeye ko ikibazo cy’inzara gihari, anatangaza ko hari ibikorwa birimo gukorwa, harimo nko kubaka amazu y’agateganyo yo kuzicumbikiramo, gusa nta munsi nyizina yatangaje bizatangira gukorerwaho.

Hagati aho, impunzi nshya ziva mu Burasirazuba bwa Repubulika Iharanira Demokarasi ya Kongo zirakomeje zikomeje kwiyongera mu Burundi zihunga imirwano hagati y’umutwe wa  M23 n’ingabo za Kongo ‘FARDC’ ifatanyije na Wazalendo.