Ni imikino yatangiye ku wa Gatanu tariki 20 Gashyantare 2026, ariko imikino yari ikomeye yari itegerejwe i Burayi ku wa Gatandatu no ku cyumweru. Ku wa Gatandatu tariki 21 Gashyantare 2026, ikipe ya Manchester City yitwaye neza itsinda Newcastle United ibitego 2-1.

Ni umwe mu mikino yari itegerejwe na benshi kuko gutsinda kwa Manchester City byari butume igabanya ikinyuranyo hagati yayo na Arsenal FC zinganya imikino 27/27.

Kuri iki cyumweru tariki 22 Gashyantare 2026, ikipe ya Arsenal FC yagombaga gukina umukino nayo ariko w'umunsi wa 28 wa Shampiyona n'ikipe ya Tottenham Hotspur. Uyu mukino warangiye ikipe ya Arsenal FC itsinze ibitego 4-1. Viktor Gyokores na Eberechi Ezi nibo batsindiye Arsenal FC.

Kugeza ubu muri Shampiyona y'u Bwongereza, yongeye gukomera ku rushaho kuko mu gihe Manchester City izatsinda umukino w'ikirarane izahita irushwa na Arsenal FC amanota abiri gusa. 

Ariko kandi mu rugamba rwo guhatanira imyanya ine ya mbere, ikipe ya Chelsea FC yananiwe gutsinda Burnley umukino urangira zinganyije igitego 1-1, Liverpool FC yitwara neza itsinda Nottingham Forest igitego 1-0, naho Aston Villa inganya na Leeds igitego 1-1. Izi kipe zitegereje umukino Manchester United irakina na Everton kuri uyu wa mbere.

Myugariro wa Chelsea FC, Wesley Fofana yahawe ikarita y'umutuku ari nayo yatumye Chelsea FC yishyurwa. Uyu musore nyuma y'iyi Karita yatangiye gukorerwa irondaruhu n'abafana ba Chelsea FC mu bwongereza nyuma yo kutishimira ibyo yakoze muri uyu mukino.

Arsenal FC nyuma yo gutsinda yagumye ku mwanya wa mbere n'amanota 61, Manchester City iguma ku mwanya wa kabiri n'amanota 56 irushwa umukino umwe, Aston Villa iri ku mwanya wa Gatatu n'amanota 51, Chelsea FC iri ku mwanya wa Kane n'amanota 45 inganya na Manchester United.

Mu gihugu cya Espagne, ikipe ya Real Madrid ku wa Gatandatu yatsinzwe na Osasuna ibitego 2-1. Ni umukino wakomereye Real Madrid kuko yararushijwe cyane, ubona inakora amakosa adakenewe yanatumye yitwara gutya.

Real Madrid gutsindwa byatumye itakaza umwanya wa mbere ku rutonde rw'agateganyo rwa Shampiyona kuko ku cyumweru FC Barcelona yatsinze Levante ibitego 3-0. Ni umukino FC Barcelona yakinnye neza kuko wabonaga ibizi ko Real Madrid yatakaje umukino ndetse yari yagaruye n'abakinnyi bayo barimo Pedri, Fermin Lopez n'abandi.

FC Barcelona yahise ifata umwanya wa mbere n'amanota 61, Real Madrid isubira ku mwanya wa kabiri n'amanota 60, mu gihe Villarreal iri ku mwanya wa Gatatu n'amanota 51. Atletico Madrid nubwo yitwaye neza igatsinda Espanol ibitego 4-2, yagumye ku mwanya wa Kane n'amanota 48.