Kuri uyu wa Gatatu tariki 14 Mutarama 2026, nibwo ikipe ya APR FC yasuye Amagaju FC mu mukino wabereye kuri Sitade ya Muhanga, urangira ibonye intsinzi y'igitego kimwe ku busa.

Ni umukino wagoye cyane APR FC kuko nubwo yatsinze yari yaruhuye abakinnyi bayo bamwe basanzwe babanzamo barimo Niyigena Clement, Memel Raouf Dao, William Mel Togui ndetse na Mugisha Gilbert.

Ikipe ya APR FC yananiwe gutsinda mu gice cya mbere nyuma y'uburyo bwagiye buhushwa na Mamadou Sy wari wabanjemo ariko n'Amagaju FC agenda agerageza kwataka nubwo bitagize umusaruro bitanga, igice cya mbere kirangira ikipe zombi zinganyije 0-0.

Ikipe ya APR FC yaje gutsinda igitego cya mbere ku munota wa 61. Ni igitego cyatsinzwe na Ombarenga Fitina wacenze ba myugariro ba Amagaju FC bikarangira atsinze igitego cya mbere. Iki gitego Ombarenga Fitina yakishimiye cyane kuko yari amaze igihe nta gitego atsindira iyi kipe.

Ikipe ya APR FC yakomeje kugenda ishaka ibindi bitego wavuga ko gutsinda igitego kimwe bitari bihagajie ariko bikomeza kugenda byanga umukino urangira itsinze igitego 1-0.

Amagaju FC yaje gukina uyu mukino nyuma yo gutsindwa na Al Hilal Omdurman ibitego 8-0 bihita bituma inirukana uwari umutoza wayo mukuru, Niyongabo Amars ndetse n'abungiriza be. Ikipe ikipe ya APR FC yo yaje gukina uyu mukino nyuma yo gutsinda ikipe ya Rayon Sports ibitego 4-1 mu mukino wa Super Cup.

APR FC nyuma yo gutsinda ikipe y'Amagaju FC, yahise ifata umwanya wa Kabiri n'amanota 32 Ku rutonde rw'agateganyo rwa Shampiyona. Ku rundi ruhande, Amagaju FC yagumye ku mwanya wa 17 n'amanota 12.