Ibi bikubiye mu butumwa yanyujije ku mbuga nkoranyambaga ze mu ijoro ryacyeye tariki 10 Ukwakira 2025, nyuma y'intsinzwi y'ikipe y'igihugu y'u Rwanda Amavubi imbere ya Benin mu mukino w'umunsi wa 9 wo gushaka itike yo gukina igikombe cy'Isi.

Ni umukino wabereye kuri Sitade Amahoro guhera ku isaha ya saa Kumi n'ebyiri z'umugoroba. Wari umukino wakaniwe cyane n'abayobozi, abakinnyi ndetse n'abafana wabonaga muri Sitade bagerageje kuza ari benshi.

Mbabazi Shadia yanze kwihangana nyuma y'igitego kimwe Benin yatsinze u Rwanda, yemeza ko bishobora kuba biterwa n'izina ryahawe iyi kipe y'igihugu y'u Rwanda ndetse asaba ko ryahindurwa.

Yagize ati " Ntacyo tutakoze Amavubi aranze aratunaniye. Umenya ikibazo ari izina noneho pee! Tuzayite Ingagi basi."

Ntabwo yanyuzwe n'ubu butumwa kuko nyuma y'Amasaha macye yahise yongera atanga ubutumwa asaba ko abatumye umutoza Frank Torsten Spittler agenda ko bafatwa bakajyanwa Iwawa cyangwa kwa Kabuga.

Yagize ati " Abantu bose batumye uyu mutoza Torsten yirukanywa, babafate babajyane mumahugurwa Iwawa no kwa Kabuga. Birahagije."

Benshi mu bakoresha imbuga nkoranyambaga cyane wabonaga bafitiye urukumbuzi Torsten Spittler kubera aho yari amaze kugeza ikipe y'igihugu y'u Rwanda Amavubi, benshi bakishimira umupira yari asigaye ikina wo gushaka ibitego bitandukanye n'uyu mutoza mushya Adel Amrouche.

Ikipe y'igihugu y'u Rwanda Amavubi yerekeje mu gihugu cya Afurika y'epfo kuri uyu wa Gatandatu tariki 11 Ukwakira 2025, aho igiye gukomeza imyiteguro y'umukino w'umunsi wa 10 izakinamo n'iyi kipe gihugu. Uyu mukino uteganyijwe kuba ku itariki 14 Ukwakira 2025.

Frank Torsten Spittler uheruka gutandukana n'ikipe y'igihugu y'u Rwanda 

Adel Amrouche akomeje kwikomwa n'abakunzi benshi b'umupira w'amaguru hano mu Rwanda 

Mbabazi Shadia yababajwe n'intsinzwi y'Amavubi