Kinyarwanda
English
Swahili
Abahungu batsinze kurusha abakobwa mu barangije amashuri yisumbuye
Minisiteri y’Uburezi yatangaje amanota y’abanyeshuri bakoze ibizamini bisoza amashuri yisumbuye, igaragaza ko mu babashije kubikora uko ari 106.079, ndetse igaragaza ko muri bo abatsinze bagize amanita 50% ari 89% ndetse abahungu batsinze kuri 93,5% mu gihe abakobwa batsinze kuri 85,5%.
Aya manota yatangajwe kuri uyu wa 1 Nzeri 2025, ndetse Minisiteri ikaba yagaragaje ko muri rusange umusaruro wavuye mu bizamini bya Leta bisoza amashuri yisumbuye mu byiciro byose ari mwiza.
Iyi Minisiteri y’Uburezi yagaragaje ko mu bakandida 106.418 biyandikishije gukora ibizamini bya Leta bisoza amashuri yisumbuye, ababashije kubikora ari 106.079, inashimangira ko abagize byibura 50% ari 89%, aho abahungu batsinze kuri 93,5% abakobwa batsinda kuri 85,5%.
Mu banyeshuri bigaga uburezi rusange, hiyandikishije 61.942 hakora 61.737; muri bo abatsinze ni 83,8% , mu gihe mu banyeshuri bigaga Tekiniki, Imyuga n’Ubumenyingiro abakoze ikizamini cya Leta ni 36.141 hatsinze 35.393 bahwanye na 98%.
Abanyeshuri 438 bigaga Ubuforomo bose baratsinze, mu gihe 3.829 bigaga muri TTC abatarabashije kugira 50% asabwa ari barindwi gusa, na ho abigaga icungamutungo (accountant) 3.916 muri bo abatsinzwe ni 825.
Hanagaragajwe ko mu banyeshuri bigaga amasomo mbonezamwuga 8.222 ari bo biyandikishije, hakora 8.201 ndetse hatsinda 89,8% muri bo.
Uko abanyeshuri batsinze ukurikije amasomo bigaga, ni uko mu 41.182 bigaga siyansi, abatsinze ari 81,45%; abigaga ubumenyamuntu 10.091 hatsinze 90,78%; mu gihe mu bigaga indimi 10.410 hatsinze 86,1%.
