Aya masezerano yo ku wa 18 Mata 2026 yashyizweho umukono ku nyandiko ihuriweho (Joint Communiqué) hagati ya Minisitiri w’Ububanyi n’Amahanga wa Uzbekistan na Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe. 

Iyi nyandiko ishyiraho ku mugaragaro umubano wa dipolomasi hagati y’ibihugu byombi.

Mu rwego rwo gukomeza gushimangira uwo mubano, hanashyizweho umukono ku masezerano hagati ya Minisiteri z’Ububanyi n’Amahanga z’ibihugu byombi, agamije gushyiraho uburyo buhoraho bwo kugirana ibiganiro bya politiki, ubu buryo buzafasha impande zombi gukomeza kungurana ibitekerezo no gushaka ibisubizo ku nyungu zihuriweho.

Iyi ntambwe ifatwa nk’ingenzi mu kwagura ubufatanye bwa Uzbekistan n’ibihugu byo ku mugabane wa Afurika, harimo n’u Rwanda rukomeje kugaragaza uruhare rugaragara mu guteza imbere imikoranire mpuzamahanga.

Uyu mubano ushobora gufungura amarembo mashya mu bijyanye n’ubucuruzi, ishoramari ndetse n’ubufatanye mu nzego zitandukanye zirimo uburezi, ikoranabuhanga n’ubuhinzi.

Gushyiraho umubano wa dipolomasi hagati y’u Rwanda na Uzbekistan byitezweho kongera ubufatanye bushingiye ku nyungu rusange no guteza imbere iterambere rirambye ku mpande zombi.