Ku wa Gatanu tariki ya 17 Mata 2027, Mu Murenge wa Nyanza, Akarere ka Gisagara hasojwe icyumweru cy’Uburinganire, hasezerana imwe  mu miryango yabanaga mu buryo butemewe n'amategeko nk'uko tubikesha Urwego rushinzwe kugenzura iyubahirizwa ry'ihame ry'Uburinganire.

Ubuhamya bwatanzwe n’Umuryango wa Habuhazi Jean de Dieu na Nidufasha Florence bwagaragaje impinduka nziza zituruka ku gusobanukirwa ihame ry’uburinganire n’ubwuzuzanye, aho bavuye mu makimbirane bagatera imbere. Basabye indi miryango ikibana mu makimbirane kuyareka kuko adindiza iterambere ry’umuryango n’iry’igihugu muri rusange.

Umuyobozi w’Akarere ka Gisagara, Rutaburingoga Jerome mu ijambo rye yagaragaje ko iki cyumweru cyaranzwe no gukora ibikorwa bitandukanye mu rwego rwo kwegera imiryango, kumva ibibazo byayo no kubikemura ku gihe. Anagaragaza ko ari intambwe yatewe kwimakaza uburinganire n’ubwuzuzanye mu miryango, ari nabyo shingiro ry’iterambere rirambye.

Umugenzuzi Mukuru w’Uburinganire wungirije Florien H Rurihose, mu ijambo yagejeje ku bitabiriye ibirori byo gusoza icyo cyumweru, yagaragaje ko kwimakaza uburinganire n’ubwuzuzanye bisaba ubufatanye bwa buri wese, anashimangira ko ari inkingi y’iterambere rirambye n’imibereho myiza y’abaturage.

Muri ibi birori, imiryango 17 yabanaga mu buryo butemewe n’amategeko yasezeranye ndetse isabwa kubaka ingo zishingiye ku bwubahane, uburinganire n’ubwuzuzanye .

Ubwo hasozwaga icyo cyumweru kandi hari imwe mu  miryango yorojwe Inka mu rwego rwo kuyifasha kugira imibereho myiza.