Aya masezerano ateganyijwe kuzafasha mu gukomeza ubufatanye hagati y’u Rwanda n’u Bushinwa mu nzego zitandukanye, zirimo ishoramari, ubucuruzi n’ikoranabuhanga. Ni intambwe ikomeye mu rwego rwo kwagura amahirwe mashya ku isoko ry’u Bushinwa ndetse no gukurura abashoramari bashya mu Rwanda.

Mu itangazo ryasohowe na RDB, aya masezerano agamije gushyiraho uburyo buhamye bwo koroshya ishoramari hagati y’impande zombi, binyuze mu bufatanye hagati y’ibigo by’ubucuruzi by’Abashinwa n’abashoramari b’Abanyarwanda.
Amasezerano azafasha gukurura abashoramari benshi baturuka mu Bushinwa bashora imari mu Rwanda, by’umwihariko mu nzego z’inganda, ikoranabuhanga, ingufu zisubira, n’ubukerarugendo.

Aya masezerano anaha u Rwanda urubuga rwo gucuruza no kwamamaza ibicuruzwa byarwo mu Bushinwa, birimo ibikomoka ku buhinzi n’ubworozi nk’ikawa, icyayi n’amabuye y’agaciro yongerewe agaciro.
Uburyo bushya bwo kwitabira imurikagurisha rya Hongqiao Expo buzafasha ibigo by’Abanyarwanda kumenyekanisha ibicuruzwa byabo no kubona abafatanyabikorwa bashya mu Bushinwa.

Uretse ubucuruzi n’ishoramari, amasezerano asinywe ateganya gushyigikira ihererekanywa ry’ubumenyi n’ikoranabuhanga hagati y’u Rwanda n’u Bushinwa.
Ibi bizafasha mu guteza imbere gahunda z’ivugurura ry’inganda, no gushyigikira ubukungu bushingiye ku bumenyi n’ikoranabuhanga, mu rwego rwo kuzamura iterambere ry’inganda n’ikoranabuhanga mu gihugu.

Hongqiao Overseas Chinese Business Association, izwiho kuba ihuza ibigo by’ubucuruzi by’Abashinwa bikorera hirya no hino ku isi, yavuze ko iri kwitegura gufasha abashoramari bayo kubona amahirwe ari mu Rwanda, igihugu gifite umutekano, politiki yorohereza ishoramari n’ubukungu buri mu byihuta mu karere.