Ni urutonde rwashyizwe hanze mu ijoro ryo ku wa Gatatu tariki 19 Ugushyingo 2025, aho ikipe y’igihugu y’u Rwanda yisanze iri ku mwanya wa 131 ari naho rwari ruri ku rutonde rw’ukwezi gushize.

Muri uku kwezi nta mukino ikipe y’igihugu y’u Rwanda Amavubi yigeze ikina, bituma iguma kuri uyu mwana n’amanota 1117.78. Ikipe y’igihugu y’u Rwanda, muri uku kwezi yakoze umwiherero ariko nta mukino yakinnye n’indi kipe y’igihugu kuko uwakinwe ni uwo yahuyemo na Al Hilal Omdurman urangira zinganyije 0-0.

Ikipe iri imbere muri Afurika n’ikipe y’igihugu ya Marocco ifite amanota 1713.12. Iyi kipe y’igihugu yakinnye imikino ibiri aho yatsinze ikipe y’igihugu ya Uganda ibitego 4-0 ndetse n’uwo yatsinzemo ikipe y’igihugu ya Mozambique urangira itsinze igitego 1-0.

Ikipe iri hafi ibarizwa ku mugabane wa Afurika y’iburasirazuba ni ikipe y’igihugu ya Uganda iri ku mwanya wa 85 n’amanota 1288.01. Indi kipe iri hafi ni ikipe y’igihugu ya Tanzania iri ku mwanya 112 naho Kenya iri ku mwanya 113.

Ikipe y’igihugu iyoboye uru rutonde ni ikipe y’igihugu ya Espagne n’amanota 1877.18, naho ku mwanya wa kabiri hari Argentine ifite amanota 1873.33.