Kinyarwanda
English
Swahili
Turikiya yasohoye impapuro zisabira Netanyahu gutabwa muri yombi
Ubushinjacyaha bukuru bwa Turikiya bwasohoye impapuro zo guta muri yombi abayobozi 37 bo muri Israel, bubashinja gukorera ibyaha bya jenoside n’ibyibasiye inyokomuntu mu Ntara ya Gaza muri Palestine.
Abo bayobozi bari kuri uru rutonde barimo Minisitiri w’Intebe, Benjamin Netanyahu; Minisitiri w’Ingabo, Israel Katz; Minisitiri w’Umutekano, Itamar Ben-Gvir; Umugaba Mukuru w’Ingabo, Lt Gen Eyal Zamir n’abandi.
Mu bikorwa Ubushinjacyaha bwa Turukiya bushinja aba bayobozi harimo gusenya ibitaro byubatswe na Turikiya muri Gaza hashingiwe ku mubano mwiza uri hagati yayo na Palestine muri Weruwe 2025.
Minisitiri w’Ububanyi n’Amahanga wa Israel, Gideon Saar, yamaganye icyemezo Ubushinjacyaha bwa Turikiya bwafashe, agaragaza ko nta kindi kigamije uretse kwiyerekana ku ruhande rwa Perezida Recep Tayyip Erdoğan.
Iki gihugu cya Turikiya ni kimwe mu bihugu byamaganye ibitero by’Ingabo za Israel muri Gaza mu 2024
Mu mwaka ushize, yiyunze kuri Afurika y’Epfo, bitanga ikirego mu Rukiko Mpuzamahanga rw’Umuryango w’Abibumbye.
