Umuryango FPR-INKOTANYI wafashe intwaro ku itariki ya mbere Ukwakira 1990 utangiza urugamba rwo kubohora u Rwanda uza no guhagarika jenoside utsinda ubutegetsi bwari buriho muri Nyakanga 1994. kuva Guverinoma y’Ubumwe bw’Abanyarwanda yajyaho, Umuryango “FPR- INKOTANYI” wabaye ku isonga mu gusana no kubaka igihugu, mu guharanira no gushimangira imiyoborere myiza n’imibanire myiza hagati y’Abanyarwanda.

Amategeko remezo ya FPR-INKOTANYI yashyizweho kandi yavuguruwe n’abanyamuryango bayo bateraniye mu nama ya Biro politiki yo ku wa 7 Kanama 2013 mu nama nkuru y’igihugu yo kuwa 15 Ukuboza 2013 no mu nama ya Biro politiki yo ku wa 16 Ukuboza 2017.

Ingingo ya mbere y’amategeko remezo ya FPR- inkotanyi nkuko yahinduwe kandi yujujwe kugeza ubu ivuga intego z’Umuryango FPR-INKOTANYI arizo Ubumwe, Demokarasi, n’Amajyambere.

Imigambi y’Umuryango FPR INKOTANYI

Ingingo ya 4 ivuga ko imigambi y’Umuryango FPR INKOTANYI ikubiye mu ngingo z’ingenzi arizo Kugarura ubumwe bw’Abanyarwanda, Kubumbatira ubusugire bw’lgihugu n’umutekano w’abantu n’ibintu, Kubaka ubuyobozi bushingiye kuri demokarasi, Kubaka ubukungu bushingiye ku mutungo bwite w’lgihugu, Guca ruswa, gutonesha n’imicungire mibi y’umutungo w’lgihugu, Kuzamura imibereho myiza y’abaturage, Guca burundu impamvu zitera ubuhunzi no gucyura impunzi z’Abanyarwanda, Guharanira umubano hagati y’u Rwanda n’ibindi bihugu ushingiye ku bwubahane, ubufatanye n’ubuhahirane, no Kurwanya jenoside n’ingengabitekerezo yayo

Ikirangantego cy’Umuryango FPR INKOTANYI n’ubusobanuro

Ikirangantego cy’Umuryango FPR-INKOTANYI ni igishushanyo cyerekana Ikiyaga gifite amazi y’urubogobogo, imisozi y’icyatsi gitoshye, izuba rirashe, iImigano ibiri isobetse n’intare. Icyo gishushanyo gikikijwe n’amabara y’ibendera ry’Umuryango FPR – INKOTANYI n’akarongo k’umuhondo kanditswemo intego z’Umuryango FPR INKOTANYI. Ikiyaga n’imisozi y’icyatsi gitoshye ni ikimenyetso cy’ubwiza bw’u Rwanda. Intare ni ikimenyetso cy’uko u Rwanda rurinzwe. Imigano ibiri isobetse ni ikimenyetso cy’ubwitange n’ubufatanye bw’abaruharaniye. Izuba rirashe ni ikimenyetso cy’amatwara mashya mu buyobozi Igihugu cyacu kizayoborwamo n’Umuryango FPR-INKOTANYI, yo rumuri rumurikira Abanyarwanda muri ayo matwara. Akarongo k’umuhondo kavuga icyizere kinini Abanyarwanda bafitiye iminsi iri imbere.

Ingingo ya 8 ivuga  ibisabwa umuntu ushaka kuba Umunyamuryango aho ivuga ko Umuryango FPR-INKOTANYI wakira umunyarwanda wese ubyemerewe n’amategeko, ugejeje nibura ku myaka cumi n’umunani (18), wemera intego, imigambi n’amategeko byawo utavanguye ibitsina, ubwoko, uturere, amadini, ubukungu n’ibindi.

Kureka kuba Umunyamuryango

Ingingo ya 11 ivuga ko Umuntu areka kuba umunyamuryango asezeye, yirukanwe cyangwa apfuye. Umunyamuryango usezeye yandikira Inteko Rusange y’lntara cyangwa Umujyi wa Kigali akabimenyesha Inama Nkuru y’Umuryango FPR-INKOTANYI ari na yo yemeza ugusezera. Umunyamuryango yirukanwa iyo atubahirije intego n’imigambi by’umuryango FPR- INKOTANYI n’andi mategeko agenga imyitwarire y’abanyamuryango nk’uko akubiye mu Mategeko Ngengamikorere. Icyemezo cyo kwirukana umunyamuryango gifatwa n’lnama Nkuru y’Umuryango FPR- INKOTANYI.

Imyanya yose y’ubuyobozi bw’Umuryango FPR INKOTANYI iratorerwa, haseguriwe ibiteganyijwe mu ngingo ya 53 y’aya mategeko shingiro. Aho muri komite nyobozi hashobora kongerwamo abakomiseri batatowe kugira ngo abanyamuryango bose bibone muri iyo Komite Nyobozi kandi ibe inafite ubumenyi n’ubushobozi bihagije nyuma yo k wemezwa n’lnama Nkuru y’Umuryango FPR- INKOTANYI.

Ingingo ya 68 ivuga inkomoko y’umutungo wa FPR INKOTANYI ariyo umusanzu w’abanyamuryango, impano n’imirage, imitungo n’ibikorwa byawo, ndetse n’inkunga ya Leta.

Ingingo ya 73 iteganya iseswa ry’Umuryango FPR INKOTANYI aho isobanura ko Umuryango FPR-INKOTANYI ushobora guseswa byemejwe n’lnama Nkuru y’Umuryango FPR- INKOTANYI idasanzwe yahamagariwe icyo kibazo. Icyemezo gifatwa nibura na bine bya gatanu (4/5) by’abayigize.

Iyo Umuryango FPR-INKOTANYI usheshwe, umutungo wawo uhabwa undi mutwe wa Politiki uwusimbuye cyangwa undi muryango nyarwanda utari uwa Leta wakwemezwa n’Inama Nkuru y’Umuryango FPR-INKOTANYI. Ingingo ya 74.