Ni urutonde rwashyizwe hanze n'ikinyamakuru Forbes gisanzwe gitangaza cyane imitungo y'ibyamamare mu ngeri zitandukanye ku isi. Cristiano Ronaldo yayoboye abandi bakinnyi binjije amafaranga menshi muri uyu mwaka ariko Lamine Yamal nawe yisanga muri uru rutonde rw'abakinnyi 10.

Uwa mbere ni Cristiano Ronaldo ufite imyaka 40 ukina muri Al Nassr. Uyu mukinnyi yinjije Milliyoni 280 z'Amadorari. Aya mafaranga Ronaldo yinjije, angana na Milliyoni 230 yavuye mu byo akora mu kibuga naho Milliyoni 50 ziba mu bindi bikorwa akora hanze y'ikibuga.

Uwa kabiri ni Lionel Messi ufite imyaka 38 winjije Milliyoni 130 z'Amadorari. Uyu mugabo ukina muri Inter Miami, Milliyoni 60 yazinjije zivuye ku bikorwa byo mu kibuga naho Milliyoni 70 ziva mu bindi bikorwa yakoze hanze y'ikibuga.

Uwa Gatatu ni rutahizamu Karim Benzema muri uyu mwaka winjije Milliyoni 104 z'Amadorari. Uyu mukinnyi w'imyaka 37, angana na Milliyoni 100 yavuye mu kibuga naho Milliyoni 4 ziva mu bindi bikorwa byo hanze y'ikibuga.

Uwa Kane ni Kylian Mbappé ukina muri Real Madrid ndetse ukomoka mu Bufaransa winjije Milliyoni 95 z'Amadorari. Kylian Mbappé w'imyaka 26, yinjije Milliyoni 70 zivuye mu kibuga naho Milliyoni 25 azinjiza zivuye hanze y'ikibuga.

Uwa Gatanu ni Erling Halaand w'imyaka 25 ukina muri Manchester City winjije Milliyoni 80. Iki kinyamakuru kivuga ko Halaand yinjije Milliyoni 60 zivuye mu byo yakoze mu kibuga, naho Milliyoni 20 ziva mu bikorwa agenda akora byo hanze y'ikibuga.

Uwa Gatandatu ni rutahizamu Vinicius Jr w'imyaka 25. Uyu mukinnyi wa Real Madrid yinjije Milliyoni 60 z'Amadorari. Vinicius Jr yinjije Milliyoni 40 zivuye mu byo akora mu kibuga naho Milliyoni 20 azinjiza zivuye mu bikorwa agenda akora hanze y'ikibuga birimo kwamamaza.

Uwa Kabirindwi ni rutahizamu wa Liverpool FC, Mohamed Salah winjije Milliyoni 55 z'Amadorari. Uyu mukinnyi w'imyaka 33, angana na Milliyoni 35 yazikuye mu byo akora mu kibuga naho Milliyoni 20 ziva mu bikorwa akora hanze y'ikibuga.

Uwa Munani ni Sadio Mane umaze kuzuza imyaka 33 winjije Milliyoni 54 z'Amadorari. Uyu mukinnyi ukomoka muri Senegal, yinjije Milliyoni 50 zivuye mu byo akora mu kibuga naho Milliyoni 4 azinjiza zivuye mu byo akora hanze y'ikibuga.

Uwa Cyenda ni Jude Bellingham w'imyaka 22, winjije Milliyoni 44. Uyu mwongereza ukina muri Real Madrid, yinjije Milliyoni 29 zavuye mu byo akora mu kibuga naho Milliyoni 15 azinjiza zivuye mu byo akora hanze y'ikibuga.

Uwa Cumi ni Lamine Yamal, winjije Milliyoni 43 z'Amadorari. Uyu musore w'imyaka 18, yinjije Milliyoni 33 z'Amadorari ndetse na Milliyoni 10 yinjije zivuye mu byo akora hanze y'ikibuga.

Uyu musore ukina muri FC Barcelona watunguranye cyane kuko imyaka ye nibyo arimo gukora ubona ko ashobora kuzaba umwe mu bayobora uru rutonde mu myaka micye iri imbere.

Cristiano Ronaldo ayoboye urutonde rw'abakinnyi binjije agatubutse

Lionel Messi ari mu binjije amafaranga menshi uyu mwaka

Kylian Mbappé yisanze muri uru rutonde 

Lamine Yamal w'imyaka 18 yaje mu bakinnyi binjije amafaranga menshi