Nk’uko amakuru abivuga, ibi biganiro byabaye mu rwego rwo kuganira ku bibazo by’umutekano bikomeje kwiyongera mu Burasirazuba bwa RDC, aho imirwano ihanganishije Ingabo za Leta n’imitwe yitwaje intwaro ikomeje guteza umutekano muke n’ihungabana ry’ubuzima bw’abaturage.

Perezida João Lourenço, usanzwe ari umuhuza mu bibazo byo mu karere ka Afurika yo hagati n’iy’iburasirazuba, yifuje kumva ibitekerezo bya Mbusa Nyamwisi ku buryo ubuyobozi bwa Kinshasa bwahangana n’ibi bibazo, ndetse no ku cyatuma haboneka umuti urambye w’amahoro.

Antipas Mbusa Nyamwisi, wabaye Minisitiri w’Ububanyi n’Amahanga ndetse akaba n’umwe mu banyapolitiki bafite ijambo rikomeye muri RDC, yagaragaje ko hakenewe ubufatanye bw’akarere n’umuryango mpuzamahanga kugira ngo ikibazo cy’umutekano gikemurwe mu buryo burambye.

Ibi biganiro bibaye mu gihe Angola ikomeje kugira uruhare rugaragara mu biganiro bigamije kugarura amahoro mu karere, cyane cyane binyuze mu bikorwa by’Umuryango wa Afurika Yunze Ubumwe n’izindi gahunda z’ubuhuza mu karere k’Ibiyaga Bigari.