Abo bafashwe ni Bob Njagi na Nicholas Oyoo, batawe muri yombi mu kwezi gushize nyuma yo kugaragara mu bikorwa byo kwamamaza bishyigikira Bobi Wine, umuyobozi w’ishyaka ritavuga rumwe n’ubutegetsi bwa Museveni.

Mu gihe cy’ukwezi gushize, hari hashize iminsi havugwa ko bashimuswe n’inzego z’umutekano, ariko ubutegetsi bwa Uganda bukomeza guhakana ayo makuru. Perezida Museveni ubwe yemeye ko abo bagabo bari “barashyizwe muri firigo”, imvugo yakoresheje agaragaza ko bari bafunzwe mu ibanga.

Museveni yavuze ko abo bagabo “ari inzobere mu myigaragambyo”, anashinja amatsinda y’abanyamahanga kuba ari yo ateza akavuyo mu karere, cyane cyane nyuma y’imyigaragambyo iherutse kubera muri Tanzania. Yaburiye ko “abagerageza gukina uwo mukino muri Uganda bazagira iherezo ribi.”

Perezida yavuze ko nyuma y’uko abayobozi bamwe bo muri Kenya bamuhamagaye, yemeye ko abo bantu barekurwa bakoherezwa iwabo.

Bob Njagi na Nicholas Oyoo bageze ku kibuga cy’indege cya Jomo Kenyatta i Nairobi ku wa gatandatu w’icyumweru gishize, aho bakiriwe n’ababashyigikiye.

Njagi yagize ati “Iminsi mirongo itatu n’umunani tumaze twarashimuswe ntiyari yoroshye. Twari tuzi ko tutazongera kuboneka turi bazima, kuko twari twarafashwe n’igisirikare.”

Urugendo rw’abo Banyakenya bombi rwongeye kugaragaza umwuka utari mwiza hagati y’ubutegetsi bwa Museveni n’abatavuga rumwe na bwo, ndetse n’uburyo inzego z’umutekano za Uganda zikunze gushinjwa ibikorwa byo guhonyora uburenganzira bwa muntu.