Ku mugoroba wo ku wa Gatanu tariki 9 Mutarama 2026, nibwo hatangiye gukinwa imikino ya 1/4 cy'igikombe cy'Afurika kiri kubera mu gihugu cya Marocco. Umukino wabimburiye iyindi yose ni uwahuje ikipe y'igihugu ya Senegal yatsinzemo ikipe y'igihugu ya Mali igitego 1-0.

Ni umukino utoroheye cyane Senegal nubwo ari yo yahabwaga amahirwe mbere yo kuza kunyagira ikipe y'igihugu ya Mali. Ku munota wa 27 ikipe y'igihugu ya Senegal yatsinze igitego cya mbere gitsinzwe na Iliman Ndiaye.

Ku munota wa 48, ikipe y'igihugu ya Mali yaje guhita ibona ikarita y'umutuku yahawe Yves

Bissouma nyuma yo gukora ikosa agahabwa ikarita ya Kabiri y'umuhondo. Ikipe y'igihugu ya Senegal yakomeje gushaka ibindi bitego ariko biranga, umukino urangira ikomeje ku gitego kimwe ku busa.

Ku isaha ya saa Tatu, nibwo hari hategerejwe umukino ukomeye wahuje ikipe y'igihugu ya Marocco iri mu rugo ndetse n'ikipe y'igihugu ya Cameroon yerekanye urwego rwo hejuru mu mikino yashize y'iki gikombe cy'Afurika.

Uyu mukino waje kurangira ikipe y'igihugu ya Cameroon itsinzwe na Marocco ibitego 2-0. Ibi bitego bya Marocco byatsinzwe na Brahim Diaz ndetse na Ismael Saibari. Ni ibitego Cameroon yatsinzwe n'ubundi ubona irimo kurushwa cyane kuko wabonaga irimo gutakaza imipira myinshi umukino urangira itarema uburyo wavuga ko bukomeye.

Ikipe y'igihugu ya Senegal na Marocco zibimburiye izindi kipe kugera muri 1/2 cy'igikombe cy'Afurika. 

Kuri uyu wa Gatandatu tariki 10 Mutarama 2026, hategerejwe imikino ikomeye irimo uw'ikipe y'igihugu ya Nigeria irakina na Algeria ndetse n'umukino urahuza ikipe y'igihugu ya Cote D'Ivoire na Misiri.

Marocco yasezereye Cameroon 

Ikipe y'igihugu ya Senegal yasezereye Mali