Ku itariki 10 Ukwakira 2025, nibwo Ubuyobozi bwa APR FC bwahagaritse abakinnyi barimo Mamadou Sy na Seidu Dauda Yusif nyuma y'imyitwarire bagaragaje ubwo iyi kipe yari mu Misiri yagiye gukina umukino wo kwishyura na Pyramids FC wa CAF Champions League.

Ibi byatumye APR FC itsindwa na Pyramids FC ibitego 3-0 kuko aba bakinnyi bahise bakurwa mu bakinnyi bari bukoreshwe muri uyu mukino.

Mu itangazo ryashyizwe agaragara, APR FC yavugaga ko ihagaritse aba bakinnyi ukwezi kumwe mu gihe hakiri gukorwa isuzumwa kuri iyi myitwarire y'aba bakinnyi itarashimishije ubuyobozi bw'iyi kipe ndetse ifata n'umwanzuro wo guhindura amatekego agenga abakinnyi.

Ku munsi wo ku wa Kane tariki 30 Ukwakira 2025, akanama gashinzwe imyitwarire muri APR FC, karateranye gafata umwanzuro wo kubabarira Mamadou Sy ndetse na Seidu Dauda Yusif.

Mu ibaruwa yasohowe kuri uyu wa Gatanu tariki 31 Ukwakira 2025, nibwo APR FC yasohoye imyanzuro nta kuka ku byemezo byafashwe n'aka kanama gashinzwe imyitwarire kigaga kuri iyi ngingo y'aba bakinnyi.

APR FC itangaza ko aba bakinnyi bemeye imyitwarire yabo mibi basaba imbabazi ndetse biyemeza gukurikiza amabwiriza y'ikipe bituma ubuyobozi bubaha imbabazi ndetse bubemerera gusanga abandi bakinnyi mu mwiherero w'ikipe.

Ibi bibaye mu gihe APR FC irimo kwitegura umukino ifitanye na Rutsiro FC kuri uyu wa Gatandatu tariki ya 1 Ukwakira 2025 ariko Kandi ikaba irimo no kwitegura umukino wa 'Derby' izakina na Rayon Sports ku itariki 8 Ugushyingo 2025.

Mamadou Sy yababariwe nyuma yo guhanwa 

Seidu Dauda Yusif nawe yemerewe kugaruka muri APR FC