Ibi bikubiye mu itangazo ishyirahamwe ry’umupira w’Amaguru hano mu Rwanda, FERWAFA, yashyize ahagaragara mu ijoro ryacyeye tariki 22 Mata 2026, igaragaza ko ikirego cya Musanze FC bamaze ku cyacyira ndetse bagiye gutangira gukora iperereza ry’imbitse kuri iki kirego.

Iki kirego kirimo gukurikiranwa na Komisiyo ya FERWAFA Ishinzwe imyitwatire hashingiwe ku mategeko ngengamyitwarire ya FERWAFA ndetse n'amabwiriza agenga RPL ku byaha bifitanye isano na ruswa cyangwa kugena ibiva mu mukino (match fixing).

Ku itariki 17 Mata 206, nibwo hagiye hanze amajwi yumvikanamo Hakizimana Imurora Japhet avugana n’umuzamu wa Musanze FC, Habarurema Gahungu, bisa nkaho yifuza ko uyu muzamu yakoroshya umukino. Uyu mukino waje no kurangira Amagaju FC atsinze ibitego 2-0. 

Nyuma y’uyu mukino, Musanze FC yahise yandikira ibaruwa FERWAFA na Rwanda Premier League yifuza kurenganurwa nyuma y’aya majwi yagiye hanze umukinnyi wabo na Imurora Japhet bagambana.

Muri ayo majwi Imurora Japhet yagaragaza ko yifuza ko uyu mukinnyi abafasha ndetse ko baraza kuvugana bakabishyira ku murongo neza kandi ko uyu mukinnyi yanasanga agafuka k’umuceri mu rugo bigenze neza.

Yagize ati “ Njyewe ngira ibanga ku buryo utakumva kuko n’uwa kubwira ko navuganye nawe wumve ko akubeshya. Nimugoroba turaza kuvugana, ibintu byose nabishyize ku murongo, wanasanga n’agafuka ku muceri mu rugo.”

Muri aya majwi kandi Gahungu abaza Imurora Japhet niba hari uwundi mukinnyi yavugishije kugira ngo amenye abo azaba arimo gukorana  nabo ariko Imurora amubwira ko atari byiza kumenya abo bazakorana.

Ishyirahamwe ry’umupira w’Amaguru hano mu Rwanda, FERWAFA, igaragaza ko umwanzuro kuri iki kibazo uzatangazwa vuba. Iki kirego nikiramuka gifashe Imurora Japhet ashobora guhabwa igihano cy’umwaka wose atagaragara mu bikorwa by’umupira nkuko byagenze kuri Mugiraneza Jean Baptiste uzwi nka Migi.

INDI NKURU WASOMA 

https://ukwelitimes.com/amajwiimurora-japhet-washatse-gutegura-musanze-fc-yashyizwe-hanze