Uru ruzinduko ruje mu gihe u Rwanda na Qatar bisanzwe bifitanye umubano ukomeye mu nzego zitandukanye, uhereye ku ishoramari, ubukerarugendo, ibikorwa remezo, ingendo zo mu kirere, ndetse no ku bufatanye mu mutekano. Mu myaka ishize, impande zombi zasinyanye amasezerano menshi agamije guteza imbere iterambere rya buri gihugu, harimo ayerekeye ibikorwa bya Qatar Airways mu Rwanda, iyubakwa ry’umujyi wa Bugesera Smart City, n’iterambere ry’umupira w’amaguru.

Mu ruzinduko rwe, Sheikh Tamim ategerejwe kugirana ibiganiro na Perezida Kagame birebana no kwagura imishinga iriho no gutekereza ku yindi mishya ishobora gufasha mu kongerera agaciro ubukungu bw’ibihugu byombi. Biteganyijwe ko impande zombi zanasinya andi masezerano mashya y’ubufatanye mu rwego rw’inganda, ikoranabuhanga n’ishoramari.

Byitezwe kandi ko Umwami wa Qatar azasura bimwe mu bikorwa binini by’igihugu byerekana intambwe u Rwanda rumaze gutera mu iterambere, birimo Parike y’Igihugu y’Akagera, ibikorwa remezo bya Kigali Arena, n’Ikibuga Mpuzamahanga cy’Indege cya Bugesera kiri kubakwa ku bufatanye n’ishoramari rya Qatar.

Uruzinduko rw’uyu muyobozi rukaba rutanga icyizere cy’uko ubutwererane bwa Qatar n’u Rwanda buzagumya kwaguka no gutanga umusaruro ufatika mu guteza imbere abaturage b’ibihugu byombi.