Kinyarwanda
English
Swahili
DRC: Abana barenga 35.000 bakorewe ihohoterwa rishingiye ku gitsina mu 2025
Nk’uko byatangajwe muri raporo nshya yashyizwe ahagaragara n’Ishami ry’Umuryango w’Abibumbye ryita ku bana UNICEF ni uko ihohoterwa rishingiye ku gitsina rikorerwa abana muri Repubulika Iharanira Demokarasi ya Congo rikomeje kwiyongera ku kigero cyo hejuru.
Iyi raporo itangwa n’abatanga serivisi zijyanye no gufasha no kurinda abakorerwa ihohoterwa rishingiye ku gitsina ku bufatanye na UNICEF, umuryango urengera abana, igaragaza ko mu mezi icyenda ya mbere ya 2025 abana barenga ibihumbi 35.000 bakorewe ihohoterwa rishingiye ku gitsina binyuze mu gukoreshwa imibonano mpuzabitsina ku gahato n’ibindi byaha bifitanye isano na byo.
UNICEF ivuga ko mu 2024 abana bagera ku bihumbi 45.000 bakorewe ihohoterwa rishingiye ku gitsina muri RDC, umubare wikubye inshuro eshatu ugereranyije n’abari bakorewe ihohoterwa mu mwaka wawubanjirije.
UNICEF ikomeza ivuga ko imibare itangazwa itagaragaza neza uko ikibazo cyo kwiyongera kw’abana bakorerwa ihohoterwa muri icyo gihugu cya RDC gihagaze, bitewe ahanini n’ubwoba, guhezwa kwa bamwe ndetse na serivisi nke z’ubuvuzi zitangwa muri icyo gihugu.
Kugeza ubu ihohoterwa rishingiye ku gitsina muri Repubulika Iharanira Demokarasi ya Congo rikomeje gufata indi ntera, ibintu UNICEF ivuga ko bikomeje guterwa n’imbaraga nke ubuyobozi bushyira mu kurirwanya, aho isaba ubuyobozi bw’icyo gihugu gushyira imbaraga mu guhashya no gukumira ihohoterwa rikorerwa abo bana.
