Ku itariki 17 Ukwakira 2025, nibwo Al Hilal Omdurman yasabye gukina Shampiyona y'u Rwanda Saison 2025-2026. Ni ikipe yasabye iri kumwe na Al Ahli Wad Madani ariko yo iza gufata umwanzuro wo kutitabira ndetse na Al Merriekh SC yaje gusaba nyuma zose zikemererwa.

Nyuma y'iminsi ine Al Hilal Omdurman imaze mu Rwanda yitegura Shampiyona ndetse n'imikino nyafurika yemeje ko umukino ufungura wayo wa Shampiyona izakina na Bugesera FC. Ni ibintu iyi kipe yatangaje kuri uyu wa Kabiri tariki 4 Ugushyingo 2025.

Uyu mukino izafunguriraho Shampiyona ikina na Bugesera FC, uteganyijwe kuri uyu wa Kane tariki 6 Ugushyingo 2025 muri Sitade Amahoro. Iyi kipe kandi yatangaje ko ku itariki 10 izakina na AS Kigali mu mukino wa Kabiri wa Shampiyona y'u Rwanda. Al Hilal Omdurman izajya yakirira imikino yayo kuri Sitade Amahoro cyane cyane imikino ya CAF Champions League.

Al Hilal Omdurman ni imwe mu makipe akomeye kuko yamaze no kumenya amakipe izahura nayo mu mikino y'Amatsinda ya CAF Champions League iteganyijwe gutangira hagati ya tariki 21 na 23 Ugushyingo 2025. Iyi kipe iri mu itsinda rimwe na Mamelodie Sundowns, MC Alger ndetse na Saint Loi Lupopo yo muri DRC.