Kinyarwanda
English
Swahili
Amerika yashimye intambwe Igezweho mu biganiro bya RDC na AFC/M23
Leta zunze ubumwe za Amerika zatangaje ko hari intambwe imaze guterwa mu biganiro biri hagati ya Guverinoma ya Repubulika Iharanira Demokarasi ya Congo n’umutwe wa AFC/M23, cyane cyane ku bijyanye n’ubutabazi n’uburenganzira bw’abaturage.
Mu itangazo rihuriweho n’impande zirebwa n’iki kibazo, hagaragajwe ko impande zombi zageze ku bwumvikane ku ngingo zitandukanye zirimo gushyiraho uburyo bwo gutanga ubufasha bwihuse ku baturage bugarijwe n’intambara, ndetse no kubahiriza uburenganzira bwabo mu rwego rw’amategeko.
Iri tangazo kandi ryibanze ku gushyira mu bikorwa uburyo bwo gukurikirana no kugenzura iyubahirizwa ry’agahenge, hagamijwe kugabanya imirwano imaze igihe mu burasirazuba bwa RDC. Ibi biteganyijwe ko bizafasha mu kugarura ituze n’umutekano mu bice byibasiwe n’imirwano.
Ikindi cyagarutsweho ni irekurwa ry’imfungwa zifitanye isano n’iyi ntambara, bikaba bifatwa nk’intambwe y’ingenzi mu kubaka icyizere hagati y’impande zihanganye no guteza imbere ibiganiro by’amahoro.
Nubwo hakiri inzitizi, iri terambere rishobora kuba intangiriro y’urugendo rugana ku mahoro arambye mu burasirazuba bwa RD Congo, mu gihe impande zose zikomeje kugaragaza ubushake bwo gukemura amakimbirane mu nzira y’ibiganiro aho gukoresha imbaraga za gisirikare.
