Ku isaha ya saa Kumi n'ebyiri z'umugoroba zo kuri uyu wa Kane tariki 5 Kamena 2025, ikipe y'igihugu y'u Rwanda Amavubi na Algeria zakinnye umukino wa gishuti wa mbere.

Ni umukino watangiye ikipe y'igihugu y'u Rwanda Amavubi, igerageza kugarira cyane kuko wabonaga ikipe y'igihugu ya Algeria irimo kubarusha gukina mu kibuga hagati ndetse ubona ko gutsinda igitego bishoboka isaha n'isaha.

Ku munota wa 28, ikipe y'igihugu y'u Rwanda Amavubi yaje gukora ikosa habaho uburangare kuri ba myugariro, baza gucibwa mu rihumye na Mohamed Youcef Belaili, atsindira Algeria igitego cya mbere.

Kuva kuri uyu munota ikipe y'igihugu ya Algeria yahise irusha cyane ikipe y'igihugu y'u Rwanda Amavubi kuko wabonaga u Rwanda turimo gutakaza imipira myinshi cyane mu kibuga hagati ndetse nta nubwo yapfaga kugera imbere y'izamu rya Algeria.

Igice cya mbere cyaje kurangira ikipe y'igihugu y'u Rwanda Amavubi itsinzwe na Algeria igitego 1-0 ariko inkuru ni uko ntacyo u Rwanda rwari rwabashije kugera imbere y'izamu rya Algeria inshuro zirenze 2.

Igice cya Kabiri, ikipe y'igihugu y'u Rwanda Amavubi yakoze impinduka zirimo kwinjiza mu kibuga abarimo Mugisha Bonheur, Nshuti Innocent ndetse na Uwimana Noe Iman na Muhire Kevin, ni naho yatangiye gukina neza kurusha mu gice cya mbere.

Ikipe y'igihugu ya Algeria hakiri kare yaje guhita itsinda igitego cya Kabiri ku makosa yakozwe na Ombarenga Fitina agahusha umupira mu buryo buteye isoni, usanga aho Jaouen Djimmy Hadjam ahagaze ahita atsinda igitego.

Ku munota wa 72, ikipe y'igihugu y'u Rwanda Amavubi yazamukanye umupira yataka cyane, Bizimana Djihad aza gufata umwanzuro wo gutera ishoti rikomeye cyane umuzamu wa Algeria awukuramo habura undi mukinnyi usubizamo.

Ikipe y'igihugu y'u Rwanda Amavubi yakomeje gushaka uko yabona igitego nibura kimwe ariko bikomeza kwanga, umukino urangira ari ibitego 2 bya Algeria ku busa bw'u Rwanda.

Ikipe y'igihugu y'u Rwanda Amavubi nyuma yo gutsindwa izakina undi mukino wa gishuti tariki 9 Kamena 2025. Ni umukino izakina n'ikipe y'igihugu ya Algeria ariko y'abakina imbere mu gihugu.