Kinyarwanda
English
Swahili
Teritwari ya Mwenga n'Idjwi ndetse na Walikale igice gito zimaze kwigarurirwa na M23
Mu gihe habura iminsi mike ngo ibiganiro hagati ya M23 na DRC bitangire nk'uko byatangajwe na Presidence ya Angola, umutwe wa M23 ukomeje kwigarurira uduce dutandukanye muri Kivu zombi, harimo na Territoire y'Idjwi iri mu Kirwa rwagati mu mazi y'Ikiyaga cya Kivu.
Umutwe wa M23 ku wa 13 Werurwe 2025 watangaje ko uhangayikishijwe n'amagambo yatangajwe n'umuvugizi wa Perezida Tshisekedi avuga ko Leta ya Kinshasa itarajwe inshinga no kwitabira ibiganiro na M23.
Mu itangazo ryasohowe na Lawrence Kanyuka uvugira ihuriro AFC/M23 ku munsi w'ejo, rigaragaza ko uyu mutwe icyo ushyize imbere ari ibiganiro biganisha ku nzira y'Amahoro, ndetse ko AFC/M23 ibona isasu ridateze kuzana ibisubizo ku kibazo kiri hagati y'impande zombi.
Ku rundi ruhande ariko, umutwe wa M23 ukomeje kugenda wigarurira uduce dutandukanye muri Kivu y'Epfo ndetse n'iya Ruguru, ku wa 13 Werurwe aba barwanyi begukanye Teritwari ya Idjwi yari imaze igihe ariyo irimo ibirindiro by'Ingabo z'Uburundi.
M23 kandi yamaze kwigarurira Teritwari ya Mwenga, ikaba ari na yo yari isigaye muri Kivu y'Amajyepfo. Amakuru kandi avuga ko abarwanyi ba M23 bari mu birometero bike hafi ya Centre ya Walikale, ibi bikaba byahise bitera guhunga kw'Abakozi ba Sosiyete ikomeye mu by'ubucukuzi bw'amabuye y'agaciro izwi nka Alfa Mines y'Igihugu cya Canad.
Ibi bibaye mu gihe habura iminsi ine gusa ngo umutwe wa M23 utangire ibiganiro na Leta ya Kinshasa bizabera i Luanda muri Angora nk'uko byatangajwe n'Ibiro bya Perezida w'iki Gihugu.
