Ku isaha ya saa Kumi n’imwe n’igice z’umugoroba kuri uyu wa Gatandatu tariki 17 Mutarama 2026, nibwo umukino hagati ya Al Hilal Omdurman na Rayon Sports, watangiye.

Ni umukino watangiye ikipe ya Rayon Sports ikina nabi ndetse ku munota wa 10 gusa, yaje guhita itsindwa igitego cya mbere gitsinzwe na El Hadji Kane. Ni umupira mwiza watewe na Aprocius Petrus. 

Igice cya mbere cyarangiye ikipe ya Rayon Sports yatsinzwe igitego kimwe ku busa. Ni igice twabonye Rayon Sports yihagararaho ntiyatsindwa ibitego byinshi nkuko benshi bari babyiteze.

Ku munota wa 50, Rayon Sports nibwo yabonye uburyo bwo gutsinda igitego ku mupira wazamukanwe na Sindi Paul Jesus ateye ishoti umupira uca hanze gato y’izamu.

Ku munota wa 55, ikipe ya Al Hilal SC yatsinze igitego cya kabiri gitsinzwe na Jean Claude Girumugisha. Ni umupira mwiza yahawe na Abdelrazig Taha nawe ntiyazuyaza ahita atsinda igitego cya kabiri.

Ku munota wa 59, ikipe ya Al Hilal SC yatsinze igitego cya gatatu gitsinzwe na Abdelrazig Taha, kapiteni w’iyi kipe. Ni igitego cyamuturutseho kuko yahaye umupira Adama Koulibaly acenga yinjira arawumusubiza nawe atsinda igitego.

Ikipe ya Rayon Sports yatsinzwe igitego cya kane mu minota itanu y’inyongera. Ni igitego cyatsinzwe na Girumugisha Jean Claude. Nyuma y’uyu mukino abafana ba Rayon Sports bashimiye abakinnye ba Al Hilal SC ndetse banaha ubutumwa umutoza wabo basaba ubuyobozi kumwirukana.

Ikipe ya Rayon Sports yagumye ku mwanya wa cyenda n’amanota 24. Ni Rayon Sports ikomeje kubabaza abakunzi bayo ndetse unabibona mu byo bagenda batangaza wumva batishimiye uko ikipe yabo itozwa.