Ibiro by'umukuru w'igihugu cy'u Rwanda Village Urugwiro byatangaje ko "ku mugoro ku Kibuga Mpuzamahanga cy’Indege cya Kigali, Perezida Paul Kagame yakiriye Perezida Bassirou Diomaye Faye wa Senegal watangiye uruzinduko rw’iminsi itatu mu Rwanda". 

Ibyabanje 

Perezida wa Senegal, Bassirou Diomaye Faye, yavuye i Dakar mu gitondo cyo kuri uyu wa Gatanu, yatangiye uruzinduko rw’akazi mu bihugu by'u Rwanda na Kenya.

Nkuko tubikesha urubuga rwa X rw’ibiro by’umukuru w’igihugu  muri Senegal, Uru ruzinduko rugamije gukomeza umubano w’ubufatanye n’ubucuti hagati ya Senegal n’ibi bihugu byo muri Afurika y'iburasirazuba.

Biteganyijwe ko Perezida Faye agirana ibiganiro na bagenzi be bo mu Rwanda na Kenya, hagamijwe gushimangira imikoranire mu nzego zitandukanye zirimo ubucuruzi, uburezi, ikoranabuhanga, n’umutekano.

Perezida Diomaye Faye yagiye ku butegetsi muri Werurwe 2024, asimbuye Macky Sall. Uru ruzinduko ni rumwe mu rwa mbere akoreye muri aka karere kuva yatangira imirimo ye.