Ni imikino yabaye mu ijoro ryo ku wa Gatatu tariki 4 Werurwe 2026. Yari imikino y’umunsi wa 28 wa Shampiyona y’igihugu cy’ubwongereza. Ni imikino yasize inkuru ku bahatanira igikombe cya Shampiyona ndetse n’amakipe ahatanira kuzaza mu myanya ine ya mbere muri iyi shampiyona.

Ikipe ya Manchester City yakoze ikosa rikomeye itakaza amanota abiri muri uyu mukino  nyuma yo kunganya na Nottingham Forest ibitego 2-2 mu mukino utari woroshye.

Antoine Semenyo yatangiye atsindira Manchester City ariko Morgan Gibbs-White aza kucyishyura ku ruhande rwa Nottingham Forest, Rodri yatsinze igitego cya kabiri ariko ntibyatinda kuko Elliote Anderson aza kucyishyura umukino urangira ikipe zinganyije ibitego 2-2.

Ku rundi ruhande ikipe ya Arsenal FC yaje kwitwara neza ibifashijwemo na Bukayo Saka afatanyije na Julian Timber wamuhaye umupira atsinda igitego ari nacyo cyatandukanyije Arsenal FC na Brighton And Hove Albion, bituma itahana amanota atatu yuzuye.

Ntabwo ari iyi mikino gusa yabaye kuko Ikipe ya Manchester United yatsinzwe na Newcastle United ibitego 2-1 mu mukino utari woroshye cyane. Manchester United yatengushye abakunzi bayo kuko Newcastle United ibi bitego byose yabitsinze yahawe ikarita y’umutuku.

Ku rundi ruhande, ikipe ya Chelsea FC ishaka kuza mu makipe ane ya mbere yari iri kunyagira Aston Villa ibitego 4-1. Aston Villa nyuma yo gutangira Shampiyona yitwara neza, ubu bikomeje kwanga ndetse birasa nkaho kuboneka mu myanya ine ya mbere bishobora kuzayigora cyane.

Ku wa kabiri tariki 3 Werurwe 2026, ikipe ya Liverpool FC nayo yatsinzwe na Wolves ibitego 2-1 ikomeza kwisubiza inyuma mu rugamba rwo kuza mu makipe ane ya mbere uyu mwaka w’imikino.

Ikipe ya Arsenal FC ubu niyo iyoboye urutonde rw’agateganyo rwa Shampiyona y’ubwongereza n’amanota 67, irarusha Manchester City amanota 7 mu gihe itarakina ikirarane ifite. Manchester United iri ku mwanya wa gatatu n’amanota 51 inganya na Aston Villa naho Chelsea FC iri ku mwanya wa gatanu n’amanota 48.