Kinyarwanda
English
Swahili
AFC/M23 yafashe Katoyi Centre muri Masisi
Agace ka Katoyi Centre, umurwa mukuru wa Katoyi muri teritwari ya Masisi mu burasirazuba bwa Repubulika Iharanira Demokarasi ya Congo, kagiye mu maboko y’abarwanyi ba AFC/M23 kuri iki Cyumweru, tariki ya 1 Werurwe 2026, nk’uko amakuru abyemeza.
Amakuru y’ibanze agaragaza ko abarwanyi ba AFC/M23 binjiye muri aka gace mu gitondo cyo kuri iki Cyumweru, nyuma y’imirwano yabaye hagati yabo n’ingabo zishyigikiye Leta ya Kinshasa.
Katoyi ni umwe mu mirenge igize teritwari ya Masisi, iherereye mu Ntara ya Kivu y’Amajyaruguru. Aka gace gafite akamaro kanini mu rwego rw’ubucuruzi n’ubuhahirane hagati y’uduce dutandukanye twa Masisi, ndetse kanifitemo ibikorwa by’ubuhinzi n’ubucukuzi bw’amabuye y’agaciro.
Ifatwa rya Katoyi Centre rije rikurikira indi mirwano imaze iminsi ivugwa muri Masisi no mu bice byegeranye, aho impande zihanganye zikomeje gushyamirana ku kugenzura uduce dutandukanye.
Ibikorwa by’imirwano bikomeje kongera impungenge ku mutekano w’abaturage bo muri Masisi, mu gihe ibiganiro bya politiki bigamije gushakira umuti ikibazo cy’umutekano mu burasirazuba bwa RDC bikomeje kugenda biguru ntege.
