Uyu muhango wo gusoza amahugurwa witabiriwe n’abayobozi batandukanye barimo Minisitiri w’Umutekano w’Imbere mu Gihugu, Dr. Vincent Biruta, Umuyobozi Mukuru wa Polisi y’u Rwanda, CG Felix Namuhoranye, ndetse n’abandi bayobozi bo mu nzego zitandukanye.

Abasoje amahugurwa barimo abahungu 1,568 n’abakobwa 337, bose bakaba barahawe amasomo atandukanye agamije kubategura neza mu nshingano zo kubungabunga umutekano w’igihugu n’abagituye.

Mu myiyereko yabaye muri uwo muhango, abapolisi basoje amahugurwa bagaragaje ubumenyi n’ubushobozi bungutse, burimo kumasha, guhosha imvururu n’izindi nyigisho zibafasha gusohoza inshingano zabo kinyamwuga.

Umuyobozi w’Ishuri rya Polisi rya Gishari, CP Robert Niyonshuti, yashimiye abasoje amahugurwa ku ishyaka n’ubwitange bagaragaje mu gihe cyose bari bamaze mu mahugurwa. Yabasabye gufata amasomo bahawe nk’intangiriro y’urugendo rurerure rwo gukorera mu mwuga wa Polisi.

Ku ruhande rwa Guverinoma, Minisitiri w’Umutekano w’Imbere mu Gihugu, Dr. Vincent Biruta, yashimiye abapolisi bashya ku cyemezo cyiza bafashe cyo kwinjira muri uyu mwuga, abibutsa ko inyigisho bahawe ari umusingi ukomeye wo kuzubakiraho bakuzuza inshingano zibategereje.

Ati: “Ndabashimira kuba mwarahisemo neza mukaza kwifatanya na bakuru banyu muri uyu mwuga. Inyigisho mwahawe ni umusingi ukomeye muzubakiraho mugakora neza imirimo ibategereje.”

Minisitiri Biruta yabibukije kandi ko umwete, umurava n’imyifatire myiza bagaragaje mu mahugurwa bikwiye gukomeza kubaranga no kubatera ishema mu kazi kabo ka buri munsi.

Yanashimiye Ubuyobozi Bukuru bwa Polisi y’u Rwanda ku muhate wo gukomeza kubaka Polisi ikomeye kandi ifite ubushobozi, anizeza ko Minisiteri y’Umutekano mu Gihugu na Guverinoma muri rusange bazakomeza gushyigikira uru rwego mu kongera ubumenyi, ubushobozi n’umubare w’abapolisi, hagamijwe gukomeza kurinda umutekano w’abaturage n’ibyabo.